“Hizbullah”ın parlament fraksiyasının yüksək rütbəli deputatı Hassan Fadlalla Livanı İsrail ilə birbaşa danışıqların mümkün fəsadları barədə xəbərdar edib.
Elchi.az xəbər verir ki, bu barədə “Associated Press” məlumat yayıb.
Cümə günü Beyrutun cənubundakı Haret-Xreyk qəsəbəsində mətbuatla görüşü zamanı o, qeyd edib:
“Bu on gün ərzində biz İranın İsraili İslamabad danışıqları ilə müəyyən edilmiş yolla getməyə məcbur etmək üçün səylərini davam etdirəcəyini gözləyirik”.
Fadlalla vurğulayıb ki, Livan İsrail ilə birbaşa danışıqlara başlamamalıdır, çünki İsrail qoşunlarının Livan ərazisində qaldığı bir vaxtda bu, təhlükəli güzəşt kimi qiymətləndiriləcək.
“Livan hökuməti nə konstitusion, nə də milli baxımdan Livanın gələcəyini təhdid edən belə təhlükəli güzəştə getmək iqtidarında deyil və buna səlahiyyəti yoxdur”, — deyə o bəyan edib.
Deputat həmçinin xəbərdarlıq edib ki, İsrailin Cənubi Livana hücumları davam edəcəyi təqdirdə “Hizbullah” kənarda qalmayacaq.
Fadlalla təsdiq edib ki, İran əldə olunmuş atəşkəs barədə “Hizbullah” rəhbərliyini əvvəlcədən məlumatlandırıb.
“Dünən atəşkəsdən əvvəl, səhər saat 4 radələrində “Hizbullah” rəhbərliyi İran səfiri tərəfindən gecə saatlarında atəşkəs olacağı barədə rəsmən məlumatlandırılmışdı”, — deyə o bildirib.
Deputatın sözlərinə görə, İran Səudiyyə Ərəbistanı və Pakistan ilə telefon məsləhətləşmələri aparıb və bu söhbətlər ümidverici olmaqla yanaşı, vəziyyətin sabitləşməsi istiqamətində ilk addım kimi atəşkəsə kömək edib.
O, qruplaşmanın əsas mövqelərinin dəyişməz qaldığını vurğulayıb: atəşkəsə tam əməl olunması, İsrail qoşunlarının çıxarılması, bütün məcburi köçkünlərin geri qayıtması, livanlı məhbusların azad edilməsi və dağıdılmış infrastrukturun bərpası.
Məryəm
