“Avropa ABŞ-ı beynəlxalq normalar çərçivəsində İranla danışıqlara təşviq edə və bununla da İslam Respublikası ətrafındakı böhranın həllində konstruktiv rol oynaya bilər”.
Elchi.az xəbər verir ki, bunu İran Prezidenti Məsud Pezeşkian fransalı həmkarı Emmanuel Makronla telefon danışığı zamanı deyib.
“İran İran xalqının hüquqlarını qorumaq üçün müstəsna olaraq beynəlxalq norma və qaydalar çərçivəsində danışıqları davam etdirməyə hazırdır və Avropa ABŞ-ı bu normalara riayət etməyə təşviq etməkdə konstruktiv rol oynaya bilər”, – prezidentin mətbuat xidməti onun sözlərini sitat gətirib.
Pezeşkianın qeyd etdiyi kimi, ekspertlər səviyyəsində əldə olunan razılaşmalara baxmayaraq, məhz ABŞ administrasiyasının həddindən artıq tələbləri və siyasi iradənin olmaması ölkələr arasında razılaşmaya mane olur.
Aprelin 11-də İran və ABŞ Pakistanın paytaxtı İslamabadda danışıqların bir neçə mərhələsi keçirib. İran nümayəndə heyətinə parlamentin sədri Məhəmməd Bağer Qalibaf, Amerika nümayəndə heyətinə isə vitse-prezident C.D.Vens rəhbərlik edib. Daha sonra hər iki tərəfin bildirdiyinə görə, bir sıra fikir ayrılıqları səbəbindən münaqişənin uzunmüddətli həlli ilə bağlı razılığa gələ bilməyiblər. Tehran və Vaşinqton arasında dialoqun inkişaf perspektivləri bəlli deyil. Ağ Ev aprelin 13-dən etibarən İrana dəniz blokadası tətbiq etmək niyyətində olduğunu açıqlayıb.
Yeganə
