“Suvar” Ləzgi Xalq Mahnı və Rəqs Ansamblı yaradıcılıq fəaliyyətinin 30 illiyini yubiley konserti ilə qeyd edəcək.
30 may tarixində Heydər Əliyev Sarayında keçiriləcək konsertdə kollektivin illər ərzində formalaşmış zəngin səhnə ənənələri və rəngarəng rəqs nömrələri tamaşaçılara təqdim olunacaq. Gecədə müxtəlif qonaqların iştirakı və maraqlı çıxışlar da gözlənilir.
Qeyd edək ki, “Suvar” ansamblı 1996-cı ildə tanınmış yazıçı-jurnalist Sədaqət Kərimovanın təşəbbüsü ilə “Samur” Ləzgi Milli Mərkəzinin dəstəyi ilə yaradılıb. 2016-cı ildə ansamblın rəhbərliyi hazırkı rəhbər Zavir Nəcəfova təhvil verilib.
2011-ci ildə Mədəniyyət və Turizm Nazirliyi tərəfindən ansambla “Xalq kollektivi” fəxri adı verilib.
“Suvar” (ləzgi dilində “bayram” deməkdir) yarandığı gündən etibarən ləzgi xalqının zəngin musiqi və rəqs mədəniyyətinin təbliğini əsas məqsəd kimi qarşıya qoyub. Kollektiv təkcə Azərbaycanda deyil, dünyanın bir çox ölkələrində uğurla çıxış edərək geniş tamaşaçı rəğbəti qazanıb.
Ansambl müxtəlif beynəlxalq festivallarda ölkəmizi layiqincə təmsil edib. 2009-cu ildə Türkiyənin TRT kanalının dəvəti ilə bu ölkədə çıxış edən kollektiv haqqında bir saatlıq sənədli film hazırlanaraq yayımlanıb. 2011-ci ildə isə ansambl Ankarada keçirilən beynəlxalq folklor festivalında Azərbaycanı təmsil edib.
Bu gün “Suvar” ansamblı öz fəaliyyəti ilə milli-mədəni irsin qorunması və gələcək nəsillərə ötürülməsinə mühüm töhfə verməkdə davam edir.
Havar Şəfiyeva
