Əmək və Əhalinin Sosial Müdafiəsi Nazirliyi ilə Latviyanın Rifah Nazirliyi arasında əməkdaşlıq üzrə Tədbirlər Planı imzalanıb.
Bu barədə Elchi.az-a Əmək və Əhalinin Sosial Müdafiəsi Nazirliyindən məlumat verilib.
Əmək və əhalinin sosial müdafiəsi naziri Anar Əliyev Latviya Respublikasının rifah naziri Reinis Uzulnieks ilə onlayn görüşündə bildirib ki, Azərbaycan və Latviya arasında münasibətlərin yüksək səviyyədə olması iki ölkənin əmək, məşğulluq, sosial müdafiə sahəsində də əlaqələrinin daim inkişaf etməsinə geniş imkanlar yaradıb.
O, Prezident cənab İlham Əliyevin tapşırıqları əsasında son illər ölkəmizdə aparılan ardıcıl sosial islahatlar, sosial müdafiə sisteminin gücləndirilməsi, aktiv məşğulluq proqramlarının genişləndirilməsi istiqamətlərində atılan addımlar barədə məlumat verib.
Həmçinin bu sahələrdə rəqəmsal həllərin geniş tətbiqi, əmək bazarının ehtiyaclarına uyğun kadr hazırlığı prosesinin gücləndirilməsi işləri diqqətə çatdırılıb. Azərbaycan və Latviya arasında qeyd edilən sahələrdə əməkdaşlığın, təcrübə mübadilələrinin həyata keçirilməsinə xüsusi önəm verildiyi vurğulanıb.
Reinis Uzulnieks iki qurum arasında əlaqələrin davamlı olaraq genişlənməsində maraqlı olduqlarını qeyd edib.
O, Latviyada həyata keçirilən sosial müdafiə və məşğulluq proqramları, ölkəsinin əmək bazarı ilə bağlı məlumat verib. İkitərəfli əməkdaşlıq təcrübəsinin uğurla davam etdirilməsi üçün qarşıdakı dövrdə də məqsədyönlü səylərin göstəriləcəyini bildirib.
Sonra Anar Əliyev və Reinis Uzulnieks Azərbaycan Respublikasının Əmək və Əhalinin Sosial Müdafiəsi Nazirliyi ilə Latviya Respublikasının Rifah Nazirliyi arasında əmək, məşğulluq və əhalinin sosial müdafiəsi sahələrində əməkdaşlıq haqqında Memorandumun icrası ilə bağlı 2026-2027-ci illər üçün Tədbirlər Planını imzalayıblar.
Tədbirlər Planında aktiv əmək bazarı siyasəti, əlilliyi olan şəxslərin, gənclərin məşğulluğu, əmək bazarının monitorinqi və proqnozlaşdırılması, əməyin mühafizəsi, insan resurslarının idarə edilməsi, xidmətlərin rəqəmsallaşdırılması, himayədar ailə qayğı modelinin inkişaf etdirilməsi, sosial xidmətlərin göstərilməsində innovativ həllərin, süni intellektin tətbiqi və s. üzrə bilik və təcrübələrin mübadiləsi, ikitərəfli müzakirələrin aparılması nəzərdə tutulur.
