İordaniya kralı II Abdullah Qəzzada davam edən müharibənin nəticələrinin “fəlakətli” olacağı barədə xəbərdarlıq edib.
Elchi.az xəbər verir ki, İordaniya Kral Məhkəməsindən verilən yazılı açıqlamada Kral II Abdullahın İordaniyaya səfər edən ABŞ dövlət katibi Antoni Blinkeni qəbul etdiyi bildirilib.
Kral Abdulla Qəzzaya davam edən hücumun “fəlakətli nəticələrə” səbəb olacağı barədə xəbərdarlıq edib və Qəzzada “faciəli humanitar böhrana” son qoyulmalı olduğunu vurğulayıb.
İordaniya kralı Qəzzada dərhal atəşkəsin təmin edilməsində, mülki əhalinin qorunmasında, bölgəyə adekvat və davamlı yardımın çatdırılmasında ABŞ-ın rolunun vacibliyini bir daha vurğulayıb.
Kral Abdullah, “Fələstin məsələsində ədalətli həll tapılmadan və iki dövlətli (Fələstin və İsrail) həllə əsaslanan ədalətli və hərtərəfli sülhə nail olmadan region sabitliyə nail olmayacaq”-deyib.
Kral Abdulla Qəzza zolağı ilə İordan çayının qərb sahilini ayırmaq və fələstinliləri Qəzza zolağı və İordan çayının qərb sahilindən məcburi köçə məruz qoymaq səylərini rədd edərək, bu cəhdlərin beynəlxalq hüququn pozulması olduğunu və qəzzalıların evlərinə qayıtmasına icazə verilməli olduğunu qeyd edib.
Kral Abdullah həmçinin yəhudi məskunlaşanların Qüdsdə fələstinlilərə, müsəlman və xristian ziyarətgahlarına hücumlarına diqqət çəkərək, bunun bölgədə böyük bir partlayışa səbəb olmadan qarşısının alınması lazım olduğunu vurğuladı.
Türkiyə, Yunanıstan, İordaniya, Qətər və Birləşmiş Ərəb Əmirliklərini əhatə edən regional turneyə çıxan ABŞ dövlət katibi Blinken İordaniyanın xarici işlər naziri Ayman əs-Safedi ilə də görüşüb.
Nuranə Məmmədova
Son şərhlər