Azərbaycanın müstəqillik tarixinin başlanğıcı birmənalı şəkildə Ümummilli lider Heydər Əliyevin adı ilə bağlıdır. Dahi şəxsiyyət müstəqilliyin ilk illərində ağır siyasi və iqtisadi böhran şəraitində olan dövləti məhv olmaqdan qurtararaq tarixi xilaskarlıq missiyasını yerinə yetirdi. 1993-cü ildən sonra 10 illik hakimiyyəti dövründə Azərbaycan Respublikası tənəzzüldən təşəkkülə, böhrandan inkişafa doğru çətin və şərəfli bir yol keçdi. Bu yolun lideri kimi Ulu öndər müasir dünya siyasi tarixinə uğurlu dövlət quruculuğu ənənəsini yazdı. Xalqını və dövlətini canından artıq sevən Ümummilli lider başladığı tarixi missiyanı, şərəfli yolu özündən sonra da davam etdirmək üçün xalqa istinad ünvanı göstərdi və müdrik xalqımız 2003-cü ilin 15 oktyabrında dahi rəhbərin siyasi kursuna sədaqət nümunəsi göstərərək cənab İlham Əliyevi Azərbaycan Respublikasının Prezidenti seçdi. Birmənalı şəkildə qeyd etmək lazımdır ki, həmin gündən etibarən geridə qalan möhtəşəm 20 ilini Azərbaycan dövlətçilik tarixinin inkişaf və tərəqqi, xalqın şərəf və qürur dövrü adlandırmaq olar.
Prezident kimi İlham Əliyev ilk gündən xalqa verdiyi “Mən hər bir Azərbaycanlının prezidenti olacam” vədini hər bir addımda doğrultmağı və ümumxalq sevgisini qazanmağı bacardı. Ötən müddət ərzində vətəndaşların sosial rifah halının yaxşılaşdırılmasına daim önəm verildi, bu istiqanətdə reallaşdırılan layihələr öz əhatə dairəsinə və imkanlarına görə əhali tərəfindən rəğbətlə qarşılandı. Eyni zamanda, ölkə iqtisadiyyatının, regionların sosial-iqtisadi inkişafı dövlət başçısının hər zaman diqqət mərkəzində oldu. Qeyri-neft sektorunun tərəqqisindən tutmuş social-iqtisadi layihələrin həyata keçirilməsinə qədər müxtəlif istiqamətlərdə Prezidentin birbaşa rəhbərliyi ilə həyata keçirilən kompleks tədbirlər rəğbətlə qarşılandı.
Son 20 ildə bütün bu proseslərlə yanaşı, Azərbaycanın beynəlxalq iqtisadi əlaqələrinin genişləndirilməsi də xüsusi diqqət mərkəzində saxlanıldı. Bunun nəticəsi olaraq Azərbaycan beynəlxalq arenada yüksək mövqe qazanaraq qlobal layihələrin müəllifi kimi nüfuz qazandı. Dünyanın şəxsiyyətinə heyranlıqla baxdığı Prezident İlham Əliyev Azərbaycanı qlobal arenada söz sahibi etdi.
Dövlətimizin başçısı İlham Əliyevin prezidentlik fəaliyyətinin ilk günlərindən etibarən respublikamızda ordu quruculuğu diqqət mərkəzində saxlanıldı. Silahlı Qüvvələrimizin hüquqi bazası təkmilləşdirildi. Ordumuzun müasir silah-sursat və hərbi texnika ilə təminatı davamlı olaraq gücləndirildi, hərbi xərclər ildən-ilə artırıldı.
Azərbaycan Silahlı Qüvvələrinin NATO üzvü və tərəfdaş dövlətlərin, həmçinin, Müstəqil Dövlətlər Birliyi və bəzi Şərq dövlətlərinin silahlı qüvvələri ilə əməkdaşlığı getdikcə genişləndirildi. Bütün bunların nəticəsində ordumuzun inkişafı və təkmilləşdirilməsi istiqamətində yeni keyfiyyət göstəriciləri əldə edildi, müdafiə sistemi təkmilləşdirildi, qoşunların döyüş qabiliyyəti yüksək səviyyəyə çatdırıldı. Həyata keçirilən bu tədbirlər isə Azərbaycanın Vətən müharibəsindəki tarixi Zəfərini şərtləndirdi.
Prezident İlham Əliyev ölkəmizi nəinki iqtisadi baxımdan inkişaf etdirərək regionun lider dövləti statusuna sahibləndirdi, eyni zamanda, 200 illik tariximizdə Azərbaycana qarşı davam etdirilən işğal sindromuna son qoydu, ölkəmizin ərazi bütövlüyünü gerçəkləşdirərək, ümumxalq qəhrəmanına çevrildi.
Dünənin və bu günün reallığı onu təsdiq edir ki, cənab İlham Əliyevin Prezident və Ali Baş Komandan kimi rəhbərliyi ilə əldə olunan möhtəşəm nəticələr Azərbaycan tarixinə qızıl hərflərlə yazılan şanlı səhifələrdir! Aprel döyüşləri, 44 günlük şərəfli Vətən müharibəsi və ən əsası isə ölkəmizin ərazi bütövlüyünün tam təmin olunması ilə yekunlaşan Qarabağda lokal antiterror tədbirləri Ali Baş Komandan İlham Əliyevin qətiyyəti və xarizmatik keyfiyyətləri ilə Azərbaycanın parlaq qələbəsi ilə nəticələndi.
Ölkə başçısı tərəfindən Xankəndidə Azərbaycan bayrağının qaldırılması hər birimizi duyğulandırdı, bir daha lideri İlham Əliyev olan ölkəmizin vətəndaşı kimi xoşbəxt anlar yaşanıldı. Bu tarixi anlar, ömür-günümüzə pozulmaz iz salan bu bəxtəvərlik heç vaxt əyilməz bir xalq olaraq yaddaşımızdan silinməyəcək.
Tarix bir daha sübut etdi ki, 2003-cü ilin oktyabrında seçki məntəqələrinə tələsərək öz əziz övladına səs verən xalqımız yanılmayıb. Yanılanlar bu ölkəyə düşmən mövqe göstərənlər, qazanan isə sevgi ünvanımız Azərbaycan oldu!
Tahirə Əsgərova,
Binəqədi Rayon Qeydiyyat şöbəsinin rəisi
Son şərhlər