Azərbaycan və Türkiyə “Yaşıl kart” sistemləri üzrə inteqrasiya protokolu imzalayıb

İcbari Sığorta Bürosu (İSB) ilə Türkiyə Motorlu Taşıt Bürosu (TMTB) arasında “Yaşıl kart” sistemləri üzrə inteqrasiya protokolu imzalanıb.

Elchi.az verdiyi məlumata görə, sənədi İSB-nin icraçı direktoru Rəşad Əhmədov və TMTB-nin müdiri Mehmet Akif Eroğlu imzalayıb.

Bildirilib ki, beynəlxalq xarakter daşıdığı üçün “Yaşıl Kart” sistemində milli sığorta büroları arasında əməkdaşlıq böyük əhəmiyyət kəsb edir. Protokol “Yaşıl kart” sistemi sahəsində tərəfdaşlıq və qarşılıqlı əməkdaşlığın təmin edilməsi məqsədi daşıyır. Sənədə əsasən Türkiyə və Azərbaycan gömrük – sərhəd keçid məntəqələrində hər iki ölkənin “Yaşıl kart”larının mümkün istifadə edilməklə yoxlanılması etibarlılığının rəqəmsal texnologiyalardan olacaq.

Tərəflər müvafiq qanunvericiliyin tələblərinə uyğun olmaqla məlumat mübadiləsi aparacaq və “Yaşıl kart” məlumatları ilə bağlı gömrük – sərhəd keçid məntəqələrinə zəruri köməkliyin göstərilməsi işini təmin edəcəklər .

Tərəflər arasındakı elektron sistemlərin inteqrasiyası “Yaşıl kart” sisteminə qoşulmuş digər üzv ölkələr üçün nümunə təşkil etməklə yanaşı rəqəmsal nəzarəti təmin edilməsinə imkan yaradacaq.

İki qurum arasında aparılan inteqrasiya işləri saxta “Yaşıl kart” müqavilələrinin satılması ilə bağlı yaşanan problemlərin həllində də əhəmiyyətli dönüş nöqtəsi hesab olunur. Belə ki, artıq Azərbaycana məxsus avtomobil Türkiyənin gömrük məntəqələrinə daxil olduqda “Yaşıl kart”ın etibarlılığı elektron qaydada müəyyən ediləcək. Türkiyədə qeydiyyatdan keçmiş nəqliyyat vasitəsi də Azərbaycana daxil olarkən elektron sistem vasitəsi ilə sığorta təminatı barədə məlumat əldə ediləcək. Bu da öz növbəsində saxta “Yaşıl kart” sığorta şəhadətnaməsi ilə ölkəyə girişin qarşısını almış olacaq.

Qeyd edək ki, BMT-nin Avropa İqtisadi Komissiyasının Yol Nəqliyyatı üzrə İşçi Qrupunun nəzdində fəaliyyət göstərən “Yaşıl kart” sistemi 1949-cu ildə beynəlxalq nəqliyyatı asanlaşdırmaq və beynəlxalq avtonəqliyyat “Yaşıl kart” sistemi çərçivəsində zərərlərin tənzimlənməsi üçün yaradılıb.

Azərbaycan və Türkiyə “Yaşıl kart” sığorta büroları olan İSB və Türkiyə Motorlu Taşıt Bürosu 46 ölkənin sığorta bürolarının təmsil olunduğu və beynəlxalq yol-nəqliyyat hadisəsində zərər çəkmiş şəxslərin hüquqlarının müdafiəsini təmin edən “Yaşıl kart” Sistemi üzrə əlaqələndirici ixtisaslaşdırılmış təşkilat kimi Bürolar Şurasının üzvləridir.