Hazırda dünya bazarında neft təklifi həddindən artıq çoxdur və son bir ayda hasilatın azaldılması ilə bağlı deyilənlər özünü doğrultmadı.

Bu sözləri  açıqlamasında Neft Araşdırmalar Mərkəzinin rəhbəri İlham Şaban deyib. Ekspert dünya bazarında neftin qiymətinin ucuzlaşmasının səbəblərindən danışıb:

“Cümə günü bağlanan hərraclar 44-56 dollar qiymətində olub. Bu, avqustda ayında qeydə alınan ən aşağı qiymət həddi deməkdir. Neftin qiymətinin bu həddə düşməsinin bir neçə səbəbi var.

Birincisi, ABŞ-da gündəlik hasilat 8,5 milyon barrel həddini ötdü.

İkincisi, ABŞ-da ehtiyatlar artmağa başladı.

Üçüncüsü, OPEK-lə bağlı çox bədbin proqnozlar ortaya qoyuldu. Yəni OPEK-in hasilatının rekord həddə çatması ilə bağlı hesabat yayıldı.

Dördüncüsü, Rusiya da oktyabrın yekunlarına görə, hasilatı daha 200 min barel artıraraq 11,2 milyon barrel rekord səviyyəyə çatdırdı. Beləliklə, həm OPEK-in üç ölkəsi, həm qeyri-OPEK ölkəsi olan Rusiya və ABŞ-ın hasilatı artırması bazarda təkliflərin artması və qiymətlərin ucuzlaşması ilə müşayiət olundu. Neft oktyabrdan başlayaraq bazarda öz real qiymətini tapır”.

İ.Şabanın sözlərinə görə, Amerikanın hazırkı siyasəti də bazara təsirsiz ötüşmür:

“Amerikanın siyasəti ona yönəlməyib ki, neftin qiyməti 20 dollaradək aşağı salınsın. Çünki Amerikanın çoxlu neft şirkətləri var və bunlar da büdcəyə vəsait ödəyirlər. Amerika sadəcə, həmin şirkətlərə biznes mühitində rəqabətə davamlı şəraitdə fəaliyyət göstərməyə imkan yaradır. Sözügedən şirkətlər elə bir səviyyəyə gəlib çatıblar ki, ən aşağı qiymət seqmentində belə mənfəətlə çalışmaq iqtidarındadırlar”.