Bakıda həkim səhlənkarlığı səbəbindən 2010-cu il təvəllüdlü uşaq dünyasını dəyişib.

Vəfat edən 5 yaşlı Ömər Fətəliyevin atası Famil Fətəliyev Publika.az-a açıqlamasında həkimlərin uşağın ölüm səbəbi və xəstəliyi barədə onlara hələ də heç bir məlumat vermədiyini deyib. F.Fətəliyevin sözlərinə görə, Ömər ötən həftənin cümə axşamı bağçadan qayıdandan sonra evdə makaron yeyib. Bir müddət sonra isə uşaq qusub: “Hövsanda 16 saylı poliklinikaya apardıq. Hərarəti var idi, iynə vurdular və hər şeyin normal olduğunu dedilər. Amma şənbə günündən başlayaraq, nə yeyirdisə, qaytarırdı. Təcili yardımla Əmircanda uşaq xəstəxanasına apardıq, zondla uşağın mədəsini yudular. Bir saat orda qaldı. Sonra uşağı 1 saylı Şəhər Kliniki Xəstəxanasına göndərdilər. Ora çatanda çox halsız idi. Uşağı rentgen, USM etdilər. Amma heç bir problem görmədiklərini dedilər. Daha sonra A.Qarayev adına 2 saylı Uşaq Kliniki Xəstəxanasına aparmağı məsləhət gördülər. Orada uşaq komaya  düşdü, mədəsində qan laxtası olduğunu dedilər. Həkimlərin sözlərinə görə, qanaxmanı dayandırdılar. Bir sutka orada qaldı.

Amma biz başqa xəstəxana da axtardıq. Müalicə üçün daha fərqli aparata ehtiyac olduğunu demişdilər. Əvvəlcə Mərkəzi Kliniki Xəstəxana ilə əlaqə saxladıq. Uşağı aparmaq üçün pul ödəməli olduğumuzu dedilər. Xəstəxananın reanimasiya şöbəsinin müvəqqəti işləmədiyini, ancaq palataya yerləşdirə biləcəklərini dedilər. Uşaq komada idi, adi palatada qala bilməzdi. Ona görə razılaşmadıq. Sonra A.Qarayev adına xəstəxanadan məsləhət gördülər ki, yaxınlıqdakı Tibb Universitetinin xəstəxanasına köçürək. Amma bunun üçün əvvəlcə həkim müayinə edib, uşaqda reaksiya olub-olmadığını müəyyən etməli idi. Həkim baxdı, martın 7-də qərar verdi ki, həmin klinikaya köçürülsün, uşaqda reaksiya var. Bir gün orda qaldı. Uşağın təzyiqi yüksəlmişdi, rəngində dəyişiklik var idi. Amma sonradan yenə əvvəlki halına qayıtdı. Dünən günorta həkimlə danışdım, vəziyyətin ağır olduğunu dedilər. Axşam isə uşağın öldüyünü dedilər”, – deyə Famil Fətəliyev bildirib.

Atanın sözlərinə görə, bu vaxta qədər ölüm kağızı onlara təqdim edilməyib və uşağın ölüm səbəbi barədə onlara məlumat verilməyib. Onun sözlərinə görə, uşaq xəstəxanaya qəbul olan günü 1000 manat pul ödənilib: “İki gün sonra maraqlandım, xəstəxanaya 750 manat borcumuz olduğunu dedilər. Bir neçə saata ödəniş edəcəyimizi dedik. Həmin söhbətdən bir neçə saat sonra uşaq öldü. Mənə uşağın ölüm xəbərini verən xanım 750 manatdan 350 manatı keçdiklərini, 400 manatı sabaha qədər ödəməli olduğumuzu dedi. Mənə bu, həddən artıq çox pis təsir edib. Mənim övladım dünyasını dəyişib. Bunlar məndən pul tələb edir. Həm də əgər kömək edə bilməyəcəkdilərsə, nə üçün bizə ümid vermişdilər? Bilmirəm pula görə edirlər, yoxsa səbəb nədir? Ehtimal edirik ki, mədəsinə zond salınmasına görə vəziyyət belə olub. Amma yenə də dəqiq səbəb bilmirik. Hər xəstəxanada bizə bir söz dedilər. Vərəm, pnevmoniya, damarın əzilməsi, beyinə qan sızması dedilər. Amma dəqiq heç nə bilmirik”.

Ata bu vaxta qədər uşağın mədəsi ilə bağlı heç bir problemin olmadığını deyir.

Ö.Fətəliyevin həkimi və xəstəxana ilə əlaqə saxladıq. Həkimi telefonlarımıza cavab verməsə də, xəstəxanadan iş saatının bitdiyini, cavab verə bilməyəcəklərini dedilər.

Qarşı tərəfin mövqeyini işıqlandırmağa hazırıq.