“Bələdiyyələrin fəaliyyətinin düzgün olması üçün onların müvafiq büdcəsi olmalıdır. Bələdiyyələr var ki, işçilərə maaş da verə bilmirlər”.

Bunu Milli Məclisin Regional məsələlər komitəsinin sədri Arif Rəhimzadə Parlamentdə müzakirəyə çıxarılan “Bələdiyyələrin fəaliyyətinə inzibati nəzarətin həyata keçirilməsi ilə bağlı illik (2015-ci il üzrə)” məruzə haqqında danışarkən deyib.

Komitə sədri bildirib ki, bələdiyyələrin bir çoxlarının Dövlət Sosial Müdafiə Fonduna 20-40 min manat arası borcu var: “Onların büdcələrinə pul daxil olan kimi dərhal fondun hesabına köçürürlər. Nəzərə alsaq ki, Respublikada bələdiyyələrin 14 faizinin əhalisi 1000 nəfərə qədərdir, o zaman onların vəziyyəti daha acınacaqlıdır. Belə bələdiyyələr tənqid edilsə də, cəzalandırılsa da vəziyyət düzəlməyəcək. Ona görə də həmin bələdiyyələrə mütləq dövlət köməyi edilməlidir. Qanunvericilik də buna imkan verir. Bunları nəzərə alaraq dövlət büdcəsindən bələdiyyələrə ayrılan vəsait artırılmalıdır”.

A.Rəhimzadə qeyd edib ki, bələdiyyələr müəyyən layihələri icra etmək üçün dövlətdən vəsait almaq hüququna malikdir.

“Nə keçən il, nə də bu il müvafiq məqsədlə vəsait yarılmayıb. Dövlət büdcəsində bununla bağlı müvafiq sətir də açılmayıb. Büdəcədə gərginliyi anlayırıq”.

Spiker Oqtay Əsədov isə çıxışında bələdiyyələrlə bağlı xoşagəlməz fikirlərin formalaşdığını deyib. Parlament ədri qeyd edib ki, bələdiyyələrin yalnız torpaq satması ilə bağlı səsləndirilən fikirlər bir kənara qoyulmalıdır:

“Bələdiyyələrə dəstək verilməli, onlara şərait yaradılmalıdır. Bunun qarşılığında isə onlardan da hərəkət olmalıdır. Lakin bələdiyyələr bunun müqabilində heç nə etmirlər. Necə ola bilər ki, bələdiyyələrin bəziləri yaxşı işləyir, bəziləri pis. Demək ki, bu iş başdan yaxşı qurulmayıb. Bələdiyyələrin hesabatını formal bir hesabata çevirməyək. Bizim onlara dəstək verməyimiz üçün onların özündə də təşəbbüs gəlməlidir”.

“Bir neçə ildir ki, bələdiyyələr tənqid və qınaq predmetinə çevrilib. Guya onlar torpaqsatan və vətəndaşların inamı itirən qurumlardır. Bəlkə də əvvəllər bununla razılaşmaq olardı, lakin indiki zəmanədə bununla qəti razı deyiləm”.

Bunu Milli Məclisin Regional məsələlər komitəsinin üzvü, deputat Kamran Bayramov parlamentdə bələdiyyələrlə bağlı müzakirələr zamanı bildirib.

“Digər yerli vergi və ödənişlər üzrə daxilolmalar artıb. Bu da o deməkdir ki, bələdiyyələr özünün əsas vəzifəsini dərk etməyə başlayıb. Artıq bütün var-güclərini və resurslarını vergi ödənişlərinin yığılmasına səfərbər ediblər. Eyni zamanda, 2015-ci ildə fiziki şəxslərin əmlak vergisindən 2014-cü illə müqayisədə 19,8 faiz artım olub. Nəzərə alaq ki, keçən ildən bütün ödəmələr bələdiyyələrə nağdsız şəkildə həyata keçirilir. Bələdiyyələrin konstitasion qurum olmasını heç kim unutmamalıdır”.

K.Bayramov qeyd edib ki, bələdiyyələrin ləğv edilməsi ilə bağlı səsləndirilən fikirləri qəti qəbul etmir: “İndiki halda onlar vergini yığa bilmirsə, yeni səaliyyətlər verilsə də bunu yenə də yarımçıq edə biləcəklər. Əsas məsələ odur ki, onlar indiki mövcud yerli vergi və ödənişləri tam şəkildə yığa bilsinlər ki, dövlət onlara etibar edib yeni səlahiyyətlər verə bilsin. Bələdiyyə vergiləri mütləq şəkildə yığılmalıdır. Bunun üçün də vətəndaşlar vergini tam vaxtında ödəməlidir”.