“Öldürülən kürdlərin üstündən götürülən silahların əksəriyyəti Rusiya istehsalıdır”

Ekspertlər hesab edirlər ki, qardaş ölkədə gərginləşən münasibətlərdə Rusiya amili əsas rol oynayır. Ötən ilin noyabrından başlayaraq Türkiyə-Rusiya münasibətlərinin gərginləşməsi, hər iki ölkə arasındakı narazılıqlarda HDP lideri Dəmirdaşın açıq şəkildə şimal qonşumuzun yanında olmasını həmin ölkəyə səfəri zamanı bəyan etməsi ekspertlərin fikirlərinin müəyyən qədər doğruluğuna dəlalət edir. Ekspertlər onu da bildirirlər ki, Rusiya qardaş ölkə üzərində üstünlük qazanmaq üçün PKK-dan alət kimi istifadə edir.

Politoloq Qabil Hüseynli Türkiyədə baş verənlərin separatizm və terror olduğunu bildirdi: “PKK dünyanın əksər ölkələri tərəfindən terror təşkilatı kimi tanınıb. Son vaxtlarda isə kürdlərin fəallaşmasında əsas rol oynayan Rusiyadır. Öldürülən kürdlərin üzərindən götürülən silahların əksəriyyəti Rusiya istehsalıdır. Hətta son bir ayda öldürülənlərin içərisində iki rus təlimatçısının nəşi də olub. Silahlar əvvəlcə PKK-nın Suriya ərazisində fəaliyyət göstərən PYD qoluna ötürülür. Düzdür, bəzi ölkələr PYD-ni terrorçu qruplaşma kimi qəbul etmirlər. Onu Suriyada müxalifətin bir hissəsi kimi qələmə verirlər. PYD-yə ötürülən silahlar asanlıqla PKK tərəfə verilir. Ona görə də bugünlərdə PKK-nın silahlandırılması ilə Rusiya məşğuldur. PKK-da alman silahları da var. Amma həmin silahları bazarlardan alırlar. Almaniya silahlarını İŞİD-ə qarşı döyüşən qüvvələrə və İraqa göndərir. Bəziləri bu silahlardan döyüş üçün istifadə etmir, bazarlarda satırlar. Belə məlumatlar var ki, Suriya ərazisində kürdlərə təlim  keçən rus təlimatçılardan ibarət düşərgə yaradılıb. Rusiya ərazisində yaşayan PKK-çılar da təlim keçərək, kürdlərin sıralarına qoşulurlar. Bütün bunlara baxmayaraq, düşünürəm ki, PKK-nın beli sındırılıb. Onların əsas qüvvələri sıradan çıxarılıb. Sadəcə, yeni qüvvələr meydana çıxır. Amma bu qüvvələr əvvəlkilərin yerini doldurmağa qadir deyil. PKK-nın müqavimətini qırmaq uzun çəkməyəcək. Bu zamana çox az qalıb”.

Politoloq Türkiyənin atmalı olduğu addımları da sadaladı: “Kürdlər evlərə daxil olur və əhalinin müəyyən təbəqəsi tərəfindən müdafiə olunurlar. Ona görə də onlara qarşı mübarizə bir qədər çətindir. Onlar partizan müharibəsi aparır. Türk əsgərlərini daim xain metodlarla şəhid edirlər. Mübarizəni çətinləşdirən amillər də bunlardır. Türk əsgəri mülki əhalinin sıradan çıxarılmasından çəkinir. Bu baxımdan geniş əməliyyatlar apara bilmir. Əhalinin arxasında gizlənib, qadınları, yaşlıları önə verən PKK-nı məhv etmək elə də asan məsələ deyil”.

Q.Hüseynli HDP liderinin ruslara dəstəkləməsinin pərdəarxası məqamlarını və Rusiyanın kürdlərdən Türkiyəyə qarşı istifadə etdiyini də qeyd etdi: “Rusiyanın Türkiyə ilə münasibətləri gərginləşən kimi, açıq şəkildə bildirmişdi ki, görün, sizin başınıza nə oyun açacağıq. Putin bu tərzdə ifadələr işlətmişdi. Bu zaman onun PKK-nı nəzərdə tutduğunu, kürdlərdən istifadə edəcəyini hər kəs anladı. Indi Rusiya guya Türkiyəni cəzalandırmaq üçün PKK variantından istifadə edir. Dəmirdaşın Rusiyaya səfəri və oradakı açıqlamaları çox şeyi sübut etdi”.

Sonda müsahibimiz Rusiya-Türkiyə münasibətlərinin düzəlməsinin PKK ilə gərginliyin aradan qalxmasına da müsbət təsir edəcəyindən söz açdı: “Gərginlik aradan qalxarsa, hər iki tərəf üzərinə müəyyən öhdəliklər götürəcək. Türkiyə vaxtilə belə bir öhdəlik götürüb. Çeçenlərin ölkələrində təlim keçməsinə izn verməyəcəyi ilə bağlı. Hər iki ölkə arasında münasibətlər düzəlsə, yəqin ki, öhdəlikləri bu şəkildə olacaq. Türkiyə çeçenlərə yardım etməyəcək, öz ölkələrində onlara sığınacaq da verməyəcək. Ruslar da bu şəkildə hərəkət edəcəklər. Hazırda Rusiya kürdlərə sığınacaq verməkdə davam edir. Amma Türkiyə əksini edərək, çeçenlərə oturum verməkdən imtina edir. Bu işlərə yenidən baxmaq lazım gələcək”.