Erməni jurnalistin Qarabağ etirafı heyrət doğurmaua bilməz
Azərbaycanın Dağlıq Qarabağ bölgəsini ələ keçirmiş işğal rejiminin özünü parlament adlandıran yığnağı yanvarın 20-də qəbul etdiyi “sənəd”lə növbəti dəfə özünü rüsvay edib.
ANS PRESS-in məlumatına görə, 1990-cı il yanvarın 20-də Bakıda baş vermiş qanlı hadisələrdən bəhs edilən sənəddə iddia edilib ki, dövlət səviyyəsində gerçəkləşdirilən terror “Dağlıq Qarabağda davam etdirilib və hakim Azərbaycan rejimi tərəfindən keçirilmiş “Həlqə” əməliyyatı zamanı 24 erməni kəndi yandırılıb, əhalisi deportasiya edilib”.
Bu iddia o qədər gülünc olub ki, hətta erməni jurnalistlərinin belə heyrətinə səbəb olub. Erməni jurnalist Haykazn Qaqriyan bununla bağlı yazıb: “Həmin vaxt Sovet İttifaqı var idi və Azərbaycan müstəqil dövlət deyildi. “Həlqə” əməliyyatı isə SSRİ 4-cü ordusunun 23-cü diviziyası tərəfindən həyata keçirilib. “Hakim Azərbaycan rejimi” sovet ordusuna əmr vermək iqtidarında deyildi”, – deyə Qaqriyan vurğulayır.
Xankəndi rejiminin 20 yanvar “sənədi” daha bir gerçəyi ortaya çıxarıb. “Sənəd”ə görə, “həmin günlərdə Ermənistanda və Qarabağda bir sıra adamlar peyda olub və onlar sovet ordusuna müqavimət göstəriblər. Moskva başa düşüb ki, məsələ dərinləşib və ona görə də qoşununu çıxarıb”, bu isə ermənilərin qələbəsinə səbəb olub. Söhbət 1990-cı ildən gedir və onda heç kimin ağlına belə gəlməzdi ki, iki ildən sonra 1991-ci ilin sonlarında SSRİ dağılacaq. Sadəcə, ermənilər etiraf edirlər ki, SSRİ prezidenti Qorbaçov və onun erməni müşavirlərinin dəstəyi ilə xaricdən Monte Melkonyan kimi terrorçular Qarabağa gətirilib, onlar silah-sursatla təmin edilərək cəza dəstələri yaradılıb. Həmin dəstələr də Dağlıq Qarabağda və ətraf rayonlarda silahsız mülki azərbaycanlıları qətlə yetirərək çıxarıb.
ANS PRESS
