Jurnalist həmkarımız Ülkər Musazadə Moderator.az-a olduqca ibrətamiz və millət adına utancverici bir yazı göndərib. Mühakimə yürütməyi oxucuların ixtiyarına buraxırıq:

“16 yanvar idi. Rusiyanın tanınmış politoloqu, jurnalisti, yazıçısı və publisisti Aleksandr Femenkov 20 yanvar hadisəsələrindən 25 il ötməsi ilə bağlı Azərbaycana gəlməsi üçün ona yardım etməyi məndən xahiş etdi. İnanın mənə, bir rusun dövlətçiliyimiz və Azərbaycan xalqı üçün bu qədər  canfəşanlıq etməsi həm xoşuma gəldi, həm də məni qürurlandırdı. O dedi ki, ən böyük arzusu 20 yanvarda şəhid olanların məzarlarını ziyarət etməkdir. Azərbaycan şəhidlərini ziyarət edib onları  qətlə yetirənlərə lənət oxumaq istəyən bu rusun gəlməsinə yardım edəcəyimi söylədim. Amma necə və nə cür yardım edəcəyimi bilmirdim. Xarici İşlər Nazirliyinin Mətbuat Xidmətinə müraciət etsəm də bir cavab gəlməmişdi. Daha sonra onun ermənilərə olan nifrətini və  Azərbaycanlılar haqqında olan fikirlərini işıqlandırmaq, ictimailəşdirmək məqsədi ilə Trend.az-a, Lider.Tv-yə  və bir neçə mediada sözü  keçən  əsl jurnalistlərə müraciət edərək, dəstək istədim. Əfsuslar olsun ki, heç kəs yardım etmək istəmədi. Mənə məlum olmayan məqam ondan ibarət idi ki, daim dünyaya duyurmaq istədiyimiz bir gün haqda qanımızdan, canımızdan olmayan bir rus  elə öz rusunu qınayacaqdı… amma nədənsə buna heç kəs əhəmiyyət vermirdi. Aleksnadr Femenkova onun 20 yanvarda Şəhidlər Xiyabanını  ziyarət etməsi üçün əlimdən gələni edəcəyimi söyləmişdim. Amma  deyəsən inandırıcı deməmişdim.  Çünki üstündən bir neçə dəqiqə sonra Aleksandr Femenkov öz  facebook səhifəsində onun 20 yanvar günü Bakıya gəlməsi üçün yardım edilməsini istəmişdi. Bir xeyirxah və xaricdə yaşayan azərbaycanlımız ona həmin gün müəyyən məbləğdə pul göndərməsini söz vermişdi.  Çox sevindim. Sevindim ki, müraciət etdiyim və yardım istədiyim azərbaycanlılardan rədd cavabı alsam da, A.Femenkova yardım edən də bir azərbaycanlı idi. 17 yanvar axşam saatlarında Aleksandr Femenkov mənə Taqanroq-Bakı qatarı ilə yola çıxdığını və yanvarın 19-artıq Bakıda olacağını söylədi. Sevincək halda bir neçə sözü və imzası ilə daim haqq-ədalətdən, dövlətçilikdən dəm vuranlara müraciət edərərək, Aleksandr Femenkov üçün mətbuat konfransı təşkil etməyi və onun ermənilər əleyhinə açıqlamalarını ictimailəşdirmək üçün yardım istədim. Hamı bir ağızdan “mətbuat konfransı üçün müəyyən yer təşkil etmək və onun haqqını vermək lazımdır” dedilər. Onlara heç cür başa sala bilmədim ki, cənablar,  bir rus politoloqunun erməni separatçıları haqqında fikrlərini ictimailəşdirmək ilk növbədə daim vətən və xalqdan yazan  şablon yazılarınızdan daha önəmlidir. Sonda CBC-də çalışan bir jurnalist dostumdan  Aleksandr Femenkovun Şəhidlər Xiyabanına ziyarətinin çəkilişini və onun açıqlamalarının ictimailəşdirilməsini xahiş etdim. Axır ki, razılaşdılar. 19 yanvarda Şəhidlər Xiyabanının önündə Aleksandr Femenkovla görüşdük. Çox gözəl açıqlamalar verdi.   Elə açıqlamalar ki, rusun özünü də məəttəl qoyacaq. Nəinki biz azərbaycanlıları…

O  Azərbaycan Rusiya münasibətlərindən danışarkən adət almış bütün politoloqlar kimi iki ölkə arasındakı münasibətləri tərifləmədi, əksinə, pərdəarxası məqamlara toxundu: “Bilirsiniz, mən Rusiya Azərbaycan münasibətlərində ikili standartlar görürəm. Daha dəqiq desək ögeylik hiss olunur. Rusiya XİN başçısı Sergey Lavrova böyük hörmətim var. O böyük siyasətçi və güclü diplomatdır. Amma nəzərə alsaq ki, onun bir tərəfi ermənidir və o azərbaycanlılara qarşı heç də ürəkaçan mövqe sərgiləmir. Hətta bu erməni qanı onun iki dövlət arasında obyektiv mövqe bildirməsinə də mane olur. Ümumiyyətlə, Rusiya Xarici İşlər Nazirliyində erməni lobbisinin təsiri güclüdür, deyə düşünürəm. Bu da Rusiyaya Azərbaycan adına gərəkli addımlar atmağa mane olur”.

Aleksandr Femenkov Xocalıdan və 20 yanvar hadisələrindən də danışdı: “Bu gün Gümridə bir ailə qətlə yetirilib. Bu erməni də olsa çox acı bir faciədir. Amma gəlin digər tərəfdən diqqət yetirək, bu sadəcə bir erməni ailəsinin qətlidir. Faciəvi şəkildə ölümüdür. Xocalı soyqrımında isə minlərlə belə ailə qətlə yetirilib. Lakin buna görə orada qətlə yetirilənlərə görə heç kəs cəzalandırlmayıb. Bu haqsızlıqdır. 20 yanvar şəhidlərini ziyarət etməyi özümə borc bildim. 20 yanvar hadisəsi Sovet İttifaqının tarixində bir qara ləkə kimi qalacaq. Bu Sovet İttifaqının böyük səhvi idi. Allah bütün şəhidlərə rəhmət eləsin!”

Aleksandr Femenkov daim Kremlin danişan dili kimi vəsv edilən Aleksandr Duqinin ermənipərəst mövqeyinin birdən-birə dəyişməsinin səbəblərinə də toxundu: “A. Duqin mövqeyini çoxdan dəyişməli idi. Ermənilər haqda mən ötən dəfə sizə müsahibəmdə də demişdim. Ermənilərlə rusların münasibəti sanki itin öz quyruğunu idarə etməsinə bənzəyir. Bu isə çox iyrənc bir görüntü sərgiləyir. Hər halda, Duqin də bu iyrəncliyin gec də olsa fərqinə varıb”.

Daha sonra Aleksandr Femenkovla xatirə şəkili çəkdirdik. Çox maraqlı bir görüş alınmışdı. Ermənilərin əleyhinə olan hər kəs mənim dostumdur! Hesab edirəm ki, müharibə şəraitində yaşayan hər bir azərbaycanlı. Hələ üstəlik jurnalist bu cür prinsiplə çalışmalıdır.”