Ukrayna Prezidenti Vladimir Zelenski ölkəsinin ərazi bütövlüyü ilə bağlı qərarı Ukrayna xalqı verməli olduğunu bildirərək əlavə etdi: “20 maddəlik planla bağlı hələ də suallar var. Xüsusilə ərazi məsələsi çox həssasdır.”
Elchi.az xəbər verir ki, Zelenski paytaxt Kiyevdə yerli və xarici jurnalistlər üçün keçirdiyi mətbuat konfransında ABŞ-ın müharibəni dayandırmaq üçün təklif etdiyi və üzərində hələ də işlədiyi sülh planı haqqında ətraflı məlumat verdi.
O, planın 20 maddəyə qədər qısaldıldığını, yenidən işlənib ABŞ tərəfinə geri göndərildiyini və “Bu, son plan deyil” deyərək bildirdi.
Ukraynanın ərazi bütövlüyü məsələsinin onlar üçün son dərəcə vacib olduğunu vurğulayan Zelenski dedi: “20 maddəlik planla bağlı hələ də suallar var. Xüsusilə ərazi məsələsi çox həssasdır. Ruslar bütün Donbası istəyirlər, amma biz bunu qətiyyən qəbul etmirik.”
Zelenski bildirib ki, ABŞ plana əsasən Donbas bölgəsini “azad iqtisadi zona” hesab edir, Rusiya isə orada “silahsızlaşdırılmış zona” istəyir və əlavə edib: “Bizim olduğumuz yerdə, yəni təmas xəttində qalmaq ədalətli olardı. Buna görə də, bu fərqli mövqelər arasında danışıqlar davam edir və hələlik heç bir nəticəyə gəlinməyib”.
Zelenski həmçinin ABŞ-ın Rusiya ordusunun Zaporojye və Xerson bölgələrində təmas xəttində qalmasını təklif etdiyini bildirib və deyib: “Bu məsələ hazırda nəzərdən keçirilir. (Rusiya ordusu) yerləşdikləri Xarkov, Sumı və Dnepropetrovsk bölgələrindəki müvafiq ərazilərdən geri çəkiləcək”. Ölkənin ərazi bütövlüyü ilə bağlı qərarların Ukrayna xalqı tərəfindən qəbul edilməli olduğunu vurğulayan Zelenski deyib: “İnanıram ki, Ukrayna xalqı bu suala seçkilər və ya referendum yolu ilə cavab verəcək. Ukrayna xalqının fikri bu qərarda mütləq əks olunmalıdır”. Zelenski ABŞ-ın Rusiyanın işğal etdiyi ərazidə yerləşən Zaporojye Atom Elektrik Stansiyası üçün “birgə idarəetmə” həlli təklif etdiyini bildirib və əlavə edib: “Əgər amerikalılar stansiyanı ələ keçirə bilsələr, onda onların stansiyadakı payının nə demək olduğu aydındır. Bu, onların təsirinə, puluna çevrilir və bizə məxsus olan bizim olaraq qalır”.
Şayəstə
