Son 10 ildə Cənubi Afrika sahillərində təxminən 62.000 Afrika pinqvininin aclıqdan öldüyü məlum olub. Yeni bir elmi araşdırma iqlim dəyişikliyinin intensiv balıqçılıq fəaliyyətləri ilə birlikdə pinqvin populyasiyasını cəmi səkkiz ildə təxminən 95 faiz azaltdığını ortaya qoyub.
Elchi.az xəbər verir ki, Exeter Universitetinin mühafizə bioloqu Riçard Şerli qeyd edib ki, bu azalma yalnız Cənubi Afrika ilə məhdudlaşmır və Afrika pinqvinləri son 30 ildə qlobal miqyasda təxminən 80 faiz azalıb.
Qida zəncirinin çökməsi
Afrika pinqvinləri hər il təxminən 20 gün quruda ərimə üçün vaxt keçirirlər. Bu müddət ərzində qidalana bilmədikləri üçün əvvəlcədən kifayət qədər yağ ehtiyatı toplamaları vacibdir. Lakin, 2004-2011-ci illər arasında onların əsas qida mənbəyi olan sardina ehtiyatları pik səviyyələrinin təxminən 25 faizinə qədər azalıb.
Şerli vurğulayıb ki, pinqvinlər ərimədən əvvəl və ya dərhal sonra kifayət qədər qida tapa bilməsələr, onların sağ qalması olduqca çətinləşir. Bildirilib ki, ölümlərin əksəriyyəti dənizdə baş verib, çünki quruda pinqvinlərin kütləvi ölümü müşahidə edilməyib.
Bu dövrdə Afrika pinqvinlərinin ən vacib iki çoxalma yerində kütləvi aclıq baş verib və təxminən 62.000 yetkin pinqvin həyatını itirib.
Kritik təhlükə altındadır
Afrika pinqvinləri kritik təhlükə altında olan növlər hesab olunur və 2024-cü ilə qədər 10.000-dən az cütlük qalıb.
Mütəxəssislər xəbərdarlıq ediblər ki, mövcud tendensiyalar davam edərsə, Afrika pinqvinləri növbəti 10 il ərzində nəsli kəsilmək təhlükəsi ilə üzləşə bilər.
Tədqiqat “Ostrich” elmi jurnalında dərc edilib.
Şayəstə
