Noyabrın 23-ü səhər saatlarında ulduzlararası obyekt 3I/ATLAS Yerə 300 milyon km-dən az məsafədə yaxınlaşdı və hər gün məsafəni 2 milyon km bağlamağa davam edir.
Elchi.az xəbər verir ki, bu barədə Rusiya Elmlər Akademiyasının Kosmik Tədqiqatlar İnstitutunun Günəş astronomiya laboratoriyası və Rusiya Elmlər Akademiyasının Sibir bölməsinin Günəş-Yer Fizikası İnstitutu məlumat verib.
“Ötən bazar günü, təxminən saat 7:30-da, ulduzlararası “kometa gəmisi” Yerdən psixoloji cəhətdən əhəmiyyətli 300 milyon kilometr sərhədi keçdi və hazırda planetə olan məsafəni hər gün təxminən 2 milyon km azaldır. Obyektin Yerə yaxınlaşması, ilk növbədə, Yerin özünün səyləri sayəsindədir, onun orbital hərəkəti hazırda demək olar ki, tam olaraq 3I/ATLAS-ın uçduğu səma nöqtəsinə yönəlib”, – deyə bəyanatda bildirilir.
Alimlər aydınlaşdırıblar ki, kometanın Günəşə nisbətən trayektoriyasını nəzərə alsaq, o, planetimizə yaxınlaşmaqda davam edərkən, artıq günəş sistemindən çıxmağa başlayıb.
3I/ATLAS müşahidələr tarixində astronomların kəşf etdiyi üçüncü ulduzlararası cisimdir. Bunlardan birincisi 2017-ci ilin payızında kəşf edilmiş Oumuamua asteroidi, ikincisi isə 2019-cu ilin avqustunda rus astronomu Gennadi Borisov tərəfindən kəşf edilmiş 2I/Borisov kometası olub. 3I/ATLAS-ın 19 dekabr 2025-ci ildə təqribən 269 milyon km məsafədə Yerə ən yaxın yaxınlaşması ehtimalı var və bundan sonra iki cisim kosmosda bir-birindən ayrılmağa başlayacaq. Alimlərin fikrincə, kometa Yer üçün heç bir təhlükə yaratmır.
Məryəm
