Ukrayna mediasının məlumatına görə, Ukrayna Prezidenti Volodimir Zelenski Rusiyanın seçkilərdən sonra yeni bir səfərbərlik dalğası həyata keçirə biləcəyini bildirib.
Elchi.az xəbər verir ki, onun sözlərinə görə, Moskva 2026-cı ildə orduya daha 300 min nəfəri cəlb etməyi planlaşdırır.
“Biz əminik ki, seçkilərdən sonra səfərbərlik olacaq. Hesab edirik ki, bu, mərkəzi şəhərlərdə baş verməyəcək. Lakin düşünmürəm ki, onlar bunu çox yaxşı gizlədə bilsinlər”, – deyə Zelenski qeyd edib.
Onun sözlərinə görə, Rusiya səfərbərliyi əsasən regionlarda həyata keçirməyi planlaşdırır. Əvvəllər Kremlin məqsədi təxminən yarım milyon nəfəri cəlb etmək idi; lakin hazırkı strategiya 2026-cı ildə əlavə 300 min, 2027-ci ildə isə müəyyən sayda hərbi qulluqçunun orduya cəlb olunmasını nəzərdə tutur.
Zelenski həmçinin qeyd edib ki, Konstantinovka–Slavyansk istiqaməti cəbhə xəttində Rusiya ordusunun əsas hədəfi olaraq qalır.
Ukrayna Prezidentinin sözlərinə görə, Putin öz generallarına Donetsk və Luqansk vilayətlərinin işğalını ilin sonunadək başa çatdırmaq tapşırığını verib.
Zelenski bildirib ki, yeni səfərbərlik halında Kremlin Ukraynanın şərqindəki vəziyyətdən çıxış edərək əlavə qüvvələr cəlb edəcəyi ehtimal olunur.
“Əgər Rusiya qoşunları şərqdə uğur qazansalar, yeni qüvvələrin bir hissəsi cəbhənin digər istiqamətlərinə yönləndirilə bilər. Bu, xüsusilə, “bufer zona” adlandırılan ərazinin yaradılması ehtimalına aiddir”, – deyə o əlavə edib.
Yeganə
