Yeni Zelandiya hökuməti İran vətəndaşlarına və bizneslərinə qarşı yeni sanksiyalar tətbiq etdiyini açıqlayıb.
Elchi.az xəbər verir ki, bu barədə Yeni Zelandiyanın xarici işlər naziri Nanaiya Mahuta ölkə hökumətinin saytında dərc olunmuş bəyanatında bildirib.
Açıqlamaya görə, yeni sanksiyalar Vellinqtonun Rusiyaya dronların tədarükü iddiasında iştirak etdiyinə inandığı İran vətəndaşları və təşkilatlara şamil ediləcək.
Sanksiyalar ötən ilin payızında İranda baş vermiş etirazların yatırılmasına görə məsuliyyət daşıyanlara da şamil olunacaq:
“İranın Rusiyaya pilotsuz təyyarələr istehsalı və tədarükü Ukraynanın suverenliyini və ərazi bütövlüyünü təhdid edir. Biz Rusiyanın döyüş maşınına təzyiq göstərmək üçün səkkiz İran vətəndaşı və biznesinə sanksiya tətbiq edirik.
Onların aktivləri dondurulacaq, səyahət qadağaları qoyulacaq və Yeni Zelandiyada hər kəslə iş görmək imkanları məhdudlaşdırılacaq”, – deyə Mahuta bildirib.
Nazir qeyd edib ki, yeni sanksiyalar siyahısına silahların hazırlanması və istehsalı ilə bağlı müəssisələrin rəhbərləri, eləcə də İran Hərbi Hava Qüvvələrinin komandanı Məhəmməd Ələvi daxildir:
“Yeni Zelandiya Məhsa Əmininin ölümündən sonra etirazların yatırılması ilə bağlı insan hüquqlarının pozulmasına, habelə bununla bağlı edamlara görə məsuliyyət daşıyan İran vətəndaşlarına qarşı əlavə sanksiyalar tətbiq edir. Biz sanksiyalara məruz qalan şəxslərin siyahısını genişləndirmişik, o cümlədən İranın ədliyyə sistemi və əxlaq polisi əməkdaşları, həmçinin hüquq-mühafizə orqanlarının rəhbərləri və İslam İnqilabı Keşikçiləri Korpusunun üzvlərinə də sanksiyalar olacaq”, – deyə XİN rəhbəri bildirib.
Sanksiya siyahısında olmaq Yeni Zelandiyadakı aktivlərin dondurulması, ölkəyə giriş və tranzitlə bağlı məhdudiyyətlər və Yeni Zelandiya vətəndaşlarının və ya şirkətlərinin siyahıda yer alan biznes və fiziki şəxslərlə biznes fəaliyyətinin qadağan edilməsi deməkdir.
Yeni Zelandiya hazırda 44 İran vətəndaşına (7-si Ukraynadakı vəziyyətlə bağlı, 37-si isə İran hakimiyyəti tərəfindən insan haqlarının pozulması ilə bağlı) və beş şirkətə (iddia edilən Rusiyaya İHA-ların tədarükü ilə bağlı) sanksiya tətbiq edib.
Yeganə
Son şərhlər