Xorvatiya və Rumıniyada ilk cüzam halları 32 və 44 ildən sonra yenidən aşkar edilib.
Elchi.az xəbər verir ki, hər iki Aİ üzvü olan Xorvatiya və Rumıniyada Asiya ölkələrindən olan xarici işçilər arasında cüzam xəstəliyi aşkar edilib. Rumıniyanın qərbindəki Kluj şəhərindəki bir spa mərkəzində iki cüzam halı qeydə alınıb. 12 dekabrda spa mərkəzində işləyən 21 və 25 yaşlarında iki indoneziyalı qadında aşkarlanan halların, 40 ildən artıq müddətdə AB ölkələrində baş verən ilk cüzam xəstəliyi olduğu bildirilir.
Rumıniya Səhiyyə Nazirliyi, İndoneziyalı işçilərin müalicə aldığını və Hansen xəstəliyi, yəni cüzamın, ölkədə sonuncu dəfə 44 il əvvəl müşahidə edildiyini açıqlayıb. Səhiyyə naziri Aleksandru Roqobete bildirib ki, spa istifadəçiləri arasında narahatlığa ehtiyac yoxdur, çünki xəstəliyin yayılması üçün uzun və yaxın təmas vacibdir. Rumıniya mediası isə xəstələrdən birinin son zamanlar Asiyaya səyahət etdiyini və eyni xəstəliklə xəstəxanaya yerləşdirilən anası ilə bir ay keçirdiyini bildirib.
Səhiyyə orqanları araşdırmalar başa çatanadək spa mərkəzini müvəqqəti olaraq bağladıqlarını açıqlayıb. Xorvatiyada, sahil şəhəri Splitdə ailəsi ilə yaşayan Nepallı bir işçiyə cüzam diaqnozu qoyulub. Bu hal, həmçinin 32 il ərzində ölkədə qeydə alınan ilk cüzam xəstəliyidir, çünki xəstəlik sonuncu dəfə 1993-cü ildə müşahidə edilib.
Xorvatiya İctimai Səhiyyə İnstitutu, iki ildir ailəsi ilə Xorvatiyada yaşayan Nepallı kişi işçisinə 14 dekabrda diaqnoz qoyulduğunu və dərhal antibiotik müalicəsinə başladığını açıqlayıb. İnstitut həmçinin, xəstə ilə yaxın təmasda olanların müəyyən edildiyini və müalicə başladıqdan sonra xəstəliyin yayılma riskinin aradan qaldırıldığını bildirib.
Cüzam bu gün ölümcül bir xəstəlik olmasa da, müalicə edilmədikdə, duyğu itkisi, əzələ toxumasının itirilməsi, dəri zədələnməsi və daimi əlillik kimi ciddi nəticələrə səbəb ola bilər.
Məryəm
