Azərbaycan Respublikası “Xocalı Soyqırımını Tanıtma” ictimai birliyinin Sumqayıt şəhər şöbəsi, 
Sumqayıt Dövlət Texniki Kollecinin pedaqoji kollektivilə birgə soyqırımın 23-cü ildönümünə həsr olunan anım mərasimi keçirib. Mərasim iştirakçıları öncə Sumqayıt Şəhidlər Xiyabanını ziyarət edərək, şəhid soydaşlarımızın məzarları önünə gül dəstələri qoyublar.
Daha sonra tədbir kollecin akt zalında davam etdirilib. Tədbiri kollecin direktoru Mətanət xanım Pirquliyeva açıb. Azərbaycanın Dövlət himni ifa edilib, şəhidlərin xatirəsi bir dəqiqəlik sükutla yad edilib.
“Xocalı Soyqırımını Tanıtma” ictimai birliyinin sədri, “Ana harayı”qəzetinin baş redaktoru, i”Tərəqqi”medalının mükafatçısı, müharibə veteranı Şamil Sabiroğlu son 200 il ərzində erməni terrorçularının və onların havadarlarının cızdıqları plan əsasında xalqımızın başına gətirilən bəlalardan danışdı. Xocalı rayon İcra hakimiyyətinin Sumqayıt şəhəri üzrə səlahiyyətlisi Aydın müəllim, şəhid Mələk xanımın atası Əli müəllim, “Xocalı Soyqırımını Tanıtma”ictimai birliyinin Sumqayıt şəhər şöbəsinin müdiri Xalidə Vural – Cəbrayılova, “Ana harayı”qəzetinin baş redaktor müavini, şair Vaqif Nəcəfzadə, şair Əşrəf Veysəlli, Sumqayıt Dövlət Universitetinin müəllimi professor Adil Baxşəliyev, ehtiyatda olan polkovnik-leytenant Soltan Bəndəliyev, tanınmış el ağsaqqalı Mirməhəmməd Əliyev və başqaları Xocalı şəhidlərinin ruhuna hörmət və ehtiramlarını bildirdilər.
Sumqayıt şəhər 7 saylı tam orta məktəbinin 7-ci sinif şagirdi Lamiyyə Qorçiyeva və kollecin istedadlı tələbələri Vətənə, torpağa həsr edilən şeirlər söylədilər.
Mərasim Azərbaycanın Milli Qəhrəmanı,şəhid soydaşımız Mübariz İbrahimov barədə “Karvan”qrupunun ifa etdiyi kliplə başa çatdı.
P.S.Tədbirin baş tutmasına lazımi dəstək göstərmiş bütün insanlara,xüsusən, kollecin direktoru Mətanət xanım Pirquliyevaya, direktor müavinləri Qafar Abdullayevə, Nizami Abdullayevə, Əsəd Qurbanova, habelə, metodist Sevda xanım Musayevaya təşəkkür edirik.
Şamilə Şamilqızı,
“Xocalı Soyqırımını Tanıtma”ictimai birliyinin üzvü, “Ana harayı” qəzeti
Son şərhlər