İyunun 24-də Venesuelada baş verən 7,2 və 7,5 bal gücündə zəlzələ nəticəsində ölənlərin sayı artmaqdadır. Milli Assambleyanın prezidenti Xorxe Rodrigez ölənlərin sayının 5208-ə, yaralıların sayının isə 16740-a çatdığını açıqlayıb.
Elchi.az xəbər verir ki, Venesuela Milli Assambleyasının (AN) prezidenti Xorxe Rodrigez sosial media hesabında zəlzələlərlə bağlı açıqlamalar verib.
Rodrigez fəlakətdə ölənlərin sayının 89 nəfər artaraq 5208-ə, yaralıların sayının isə 16740-a çatdığını qeyd edib.
Rodrigez bildirib ki, 107 müvəqqəti sığınacaqda 23820 nəfər qalır və indiyə qədər 128324 ailəyə yardım çatdırılıb.
Milli medianın məlumatına görə, 24 iyunda baş verən zəlzələlərdən bəri bölgədə ümumilikdə 1388 afterşok qeydə alınıb.
Venesuelanın yenidənqurma planı
Venesuela Ətraf Mühit Nazirliyi zəlzələlərdən ən çox təsirlənən La Guaira şəhərinin sahil xəttini təmizləmək və yenidən qurmaq üçün başladılan “Ətraf Mühitin Bərpası Planı”nda irəliləyiş olduğunu açıqladı. Nazirliyin rəsmi İnstaqram hesabında verilən açıqlamada sahil xəttinin ekoloji tarazlığını və ekosistemini bərpa etmək üçün yerli bitki növlərinin əkiləcəyi bildirilib.
Bu arada, Ətraf Mühit naziri Nelson Rodrigez mətbuata bildirib ki, ikiqat zəlzələdən sonra bölgədə 2.106.000 ton zibil yığılıb və bu rəqəm Venesuela hökuməti ilə Birləşmiş Millətlər Təşkilatının İnkişaf Proqramı (BMTİP) arasında birgə səylərin bir hissəsi olaraq aparılan qiymətləndirmə modelləşdirməsi ilə müəyyən edilib.
Şayəstə
