24 iyunda Venesuelada baş verən iki böyük zəlzələdə həyatını itirənlərin sayı 5346-ya çatıb.
Elchi.az xəbər verir ki, Venesuela Milli Assambleyasının (AN) prezidenti Xorxe Rodrigez sosial media hesabında verdiyi açıqlamada zəlzələdə həyatını itirənlərin sayının 68 nəfər artaraq 5346-ya, yaralıların sayının isə 16740-a çatdığını bildirib.
Milli mətbuatda yer alan xəbərlərə görə, Venesuela hökuməti könüllülərdən zəlzələ qurbanlarının şəxsiyyətini müəyyən etmək üçün DNT nümunələri təqdim etmələrini istəyib.
Milli Məhkəmə Tibbi Ekspertizası və Elmləri Xidməti (Senamecf) və Daxili İşlər Nazirliyinin birgə açıqlamasında qohumlarının zəlzələdən ən çox təsirlənən La Quayra əyalətində və ya paytaxt Karakasdakı Bello Monte morqunda ola biləcəyinə inanan ailələrdən şəxsiyyətin müəyyənləşdirilməsi prosesinin həyata keçirilməsi üçün DNT nümunələri təqdim etmələri tələb olunub.
İtkin düşənlərin taleyi qeyri-müəyyən olaraq qalır
Venesuela hakimiyyəti itkin düşmüş insanların sayı ilə bağlı rəsmi açıqlama verməsə də, zəlzələlərdən sonra qohumlarının itkin düşməsi barədə məlumat verən “Desaparecidos Terremoto Venezuela” (Venesuela Zəlzələsindən İtkin Düşmüş Şəxslər) vətəndaş təşəbbüsünün veb saytında 29.500 nəfərin itkin düşdüyü bildirilir.
Venesuelada iki böyük zəlzələ baş verib.
ABŞ Geoloji Xidməti (USGS) 24 iyunda Venesuelada 39 saniyə fərqlə 7,2 və 7,5 bal gücündə iki zəlzələnin baş verdiyini bildirib. Birləşmiş Millətlər Təşkilatının İnkişaf Proqramı (BMTİP) 26 iyun tarixli açıqlamasında zəlzələlərin vurduğu birbaşa fiziki ziyanın dəyərini 6,7 milyard dollar olaraq qiymətləndirib.
Şayəstə
