Artıq 4-cü gündür ki, Laçın dəhlizində yaranan problemi əsas gətirən erməni təbliğatı bütün dünyaya car çəkir ki, guya ermənilər qarabağda humanitar fəlakətlə üzləşiblər. Hətta həyasızcasına iddia edirlər ki, guya Azərbaycan tərəfinin başladığı ekoaksiya erməni soyqırımına yol açacaq və erməni əhali aclıq fəlakəti ilə üzləşib. Elə dediklərinin də “yalançının yaddaşı olmaz misalı” özləri təkzib edir. Belə ki, bu gün üzdəniraq “Artsax Respublikasının” Dövlət Naziri, Operativ Qərargahın rəisi Ruben Vardanyanın sədrliyi ilə keçirilən işçi iclasda blokada nəticəsində yaranmış vəziyyətdə əhalinin normal həyatının təmin edilməsi məsələləri müzakirə edilib.
Elchi.az xəbər verir ki, bu barədə üzdəniraq “Artsax” hökumətinin mətbuat xidməti məlumat yayıb.
İclası açan dövlət naziri Ruben Vardanyan vurğulayıb ki, “Biz hamımız qanun qarşısında bərabərik, tutduğumuz mövqe heç bir məsələnin həllində üstünlük verə bilməz. Yalnız bu cür yanaşma ilə çağırışları, eləcə də ədalətsizlik hissini aradan qaldırmaq olar”.
Qiymət artımının mümkün təzahürlərindən danışan Vardanyan sahibkarların belə ağır vəziyyətdən malların əsassız olaraq bahalaşması üçün istifadə etməsini yolverilməz hesab edib. Ona enerji təchizatı ilə bağlı vəziyyət də təqdim olunub, elektrik enerjisi çatışmazlığını minimuma endirəcək tədbirlərin həyata keçirilməsi müzakirə olunub. Eyni zamanda, istehlak edilmiş elektrik enerjisinin haqqının düzgün ödənilməsinin vacibliyi vurğulanıb.
Həmçinin məlumat verilib ki, Respublikada kifayət qədər un ehtiyatı var və çörək istehsalı normal rejimdə aparılır. Böyük çörək zavodlarının alternativ yanacaq və digər enerji mənbələri ilə təmin edilməsi imkanları da müzakirə olunub.
Şayəstə
Son şərhlər