ABŞ Prezidenti Donald Tramp 11 sentyabr hücumlarından sonra ölkəsinin İraqa müdaxiləsi ilə bağlı dedi: “Aydındır ki, onlar yanlış ölkəyə hücum etdilər və böyük ziyan vurdular”.
Elchi.az xəbər verir ki, Tramp və İraq Baş naziri Əli əl-Zeydi Ağ Evdə görüşdükdən sonra mətbuat konfransı keçirdilər.
ABŞ-ın İraqa müdaxiləsinə qarşı olduğunu bildirən Tramp dedi: “Mən həmişə demişəm ki, İraqa girməyin. İraqa hücum etməyin. Aydındır ki, onlar yanlış ölkəyə hücum etdilər və böyük ziyan vurdular”.
Zeydinin seçki prosesindəki mübarizəsini tərifləyən Tramp, İraqın yeni baş naziri ilə, xüsusən də ölkənin neft ehtiyatları ilə bağlı aparılacaq əməkdaşlığa toxundu.
ABŞ qoşunlarının İraqdan çıxarılması ilə bağlı suala Tramp belə cavab verdi: “Artıq orada orduya ehtiyacımız olduğunu düşünmürük. Sizin böyük bir imkanınız var. Bütün neft şirkətləri indi İraqla tərəfdaşlıq qurur və çox yaxşı yola gedirlər. Bu, orada orduya ehtiyacımız olmadığı böyük bir münasibətdir”.
Tramp, lazım gələrsə, İraqı qorumaq üçün bölgədə olacaqlarını, lakin “bunun lazım olacağını düşünmədiklərini” bildirdi. İraqın Baş naziri Zeydi də ölkəsinin İŞİD terror təşkilatına qarşı mübarizəsinə diqqət çəkərək, bu mübarizənin İraqa “400 milyard dollardan çox” başa gəldiyini vurğuladı. Zeydi, İŞİD-ə qarşı mübarizənin İraqın infrastrukturunu məhv etdiyini qeyd edərək, “Bu gün İraqdakı bəzi şəhərlər tamamilə dağıdılıb, onlar qaçqın düşərgələri kimidir. Onları evlərinə qaytarmaq üçün planımız var. Bizə ədalətli bir pay lazımdır” dedi.
Şayəstə
