ABŞ Prezidenti Donald Tramp İrana növbəti dəfə xəbərdarlıq edərək dedi: “Gözləyin və görün İrana nə edəcəyik. Onlara ağır zərbə endirəcəyik. Səbrimiz bir növ tükənib. Əslində, bilirsinizmi, səbrimiz tamamilə tükənib”.
Elchi.az xəbər verir ki, Prezident Tramp Alyaskanın Vasilla şəhərində keçirilən mitinqdə İranla bağlı hərbi gərginlikdən danışdı. İrani çox sərt və bir çox cəhətdən pis bir ölkə kimi xarakterizə edən Tramp dedi: “Onlar bütün dünyada terrorun bir nömrəli dövlət himayədarıdırlar. Nüvə silahına sahib olmağa cəmi iki həftələri qalmışdı”.
İranın yaratdığı nüvə təhlükəsinin daha əvvəl aradan qaldırıla biləcəyini, lakin əvvəlki ABŞ prezidentlərinin bunu bacarmadığını qeyd edən Tramp dedi: “Onlara milyardlarla dollar verən Barak Obama bunun qarşısını çoxdan almalı idi. Yadınızdadırmı, o, İrana nağd şəkildə 1,7 milyard dollar vermişdi. “Boeing 757″ təyyarəsini nağd pulla doldurub ora göndərmişdilər. Görəsən, həmin pula nə oldu? Təyyarəni görəndə o adamların üz ifadəsini təsəvvür edə bilirsinizmi? Üstəlik, onlar İrana on milyardlarla dollar ödədilər və bilirsinizmi İran nə etdi? Həmin puldan raketlər və nüvə silahları hazırlamaq üçün istifadə etdilər. Beləliklə, digər prezidentlər də mənim etdiyimi etməli idilər”.
“Müharibə çox tezliklə bitəcək”
İranın 51 ildir Yaxın Şərqdə zorba kimi davrandığını iddia edən Tramp dedi: “Amma onlar artıq Yaxın Şərqin zorbası deyillər. Bu müharibə çox tezliklə bitəcək”. Həyata keçirdikləri hücumlarla İrana böyük zərbə endirdiklərini bildirən Tramp dedi: “Onların hərbi-dəniz qüvvələri yoxdur. Hərbi-hava qüvvələri yoxdur. Hava hücumundan müdafiə sistemləri yoxdur. Əllərində heç nə qalmayıb. Sahib olduqları yeganə şey inflyasiyadır. Dünyadakı bütün ölkələr arasında ən yüksək inflyasiya səviyyəsi onlardadır. Pulları yoxdur. Əsgərlərinə pul ödəmir, təhlükəsizlik qüvvələrinə və polisə maaş vermirlər”. İranla müharibənin tez başa çatacağını bir daha vurğulayan Tramp dedi: “İran nüvə silahına sahib olmayacaq. Əgər bəla görmək istəyirsinizsə, qoy nüvə silahına sahib olsunlar. Bax, əsl bəlanı onda görəcəksiniz.”
Şayəstə
