ABŞ prezidenti Donald Tramp avqustun 15-də Rusiya prezidenti Vladimir Putinlə Alyaskada keçirdiyi görüşdən atəşkəs əldə olunacağına ümid etdiyini ifadə edərək, “Məncə, Putinlə görüşüm yaxşı keçəcək, amma pis də gedə bilər”, – deyib.
Elchi.az xəbər verir ki, ABŞ prezidenti Tramp Ağ Evdə keçirdiyi mətbuat konfransında Rusiya-Ukrayna müharibəsi ilə bağlı açıqlamalar verib.
Avqustun 15-də Alyaskada keçiriləcək görüşdən ümidli olduğunu və bu müharibənin bir an əvvəl bitməsini istədiyini bildirən Tramp, Putinlə görüşün “çox konstruktiv” olacağına inandığını, lakin nəticəsini hələlik bilmədiyini vurğulayıb.
“Mən Vladimir Putinlə görüşəcəm və ona deyəcəyəm: Siz bu müharibəni bitirməlisiniz”, – ABŞ prezidenti bildirib.
Çıxışının bir yerində Tramp Alyaska yerinə “Rusiyaya gedəcəm” desə də, sonrakı açıqlamalarında Putinin Amerika torpağına gələcəyini və bunun “şərəfli” bir şey olduğunu bildirib.
Putinlə görüşdən sonra Zelenski ilə də görüşəcəyinə işarə edən Tramp, bu iki liderin sonda eyni otaqda görüşərək razılığa gələcəyinə ümid etdiyini vurğulayıb.
Rusiyanın Ukrayna ərazisinin əhəmiyyətli bir hissəsini işğal etdiyini açıqlayan və Ukraynanın müqavimət göstərəcək o qədər də gücə malik olmadığını əsas gətirən ABŞ prezidenti, “Bəzi bölgələrin Ukraynaya qaytarılmasını təmin etməyə çalışacağıq. Həmçinin iki ölkə arasında (əgər razılıq əldə olunarsa) ərazi mübadiləsi aparılacaq” – deyib.
Nuranə Məmmədova
