“Tesla” Çində öz tarixinin ən böyük avtomobil geri çağırılmasını elan edib.
Elchi.az-ın məlumatına görə, yerli tənzimləyici orqanın bəyanatına istinadən “Reuters” xəbər verir ki, bu qərar təxminən 6 milyon avtomobilə şamil olunacaq.
Xüsusilə, “Tesla” Çində istehsal olunmuş və ya xaricdən idxal edilmiş 2,98 milyon “Model 3”, “Model Y”, “Model S” və “Model X” avtomobilini geri çağırır. Bu modellərdə qapının qəza zamanı açılması üçün nəzərdə tutulan tutacaqlar kifayət qədər aydın işarələnməyib və bu səbəbdən qəza zamanı sürücü və sərnişinlərin maşını tərk etməsinə əlavə vaxt tələb oluna bilər. Şirkət geri çağırılan avtomobilləri yeni göstəricilərlə təmin edəcək və onlarda proqram təminatını yeniləyərək toqquşmadan sonra şüşələrin avtomatik enməsi funksiyasını tətbiq edəcək.
Bununla yanaşı, geri çağırılma Çində istehsal olunmuş 2,74 milyon “Model 3” və “Model Y” modellərinə də şamil olunacaq. Avtopilot qoşulu olduqda sürücünün diqqətinə nəzarəti gücləndirmək üçün həmin avtomobillərdə proqram təminatı yenilənəcək. Yenilənmə məsafədən (onlayn) həyata keçiriləcək və diler mərkəzinə baş çəkməyə ehtiyac qalmayacaq.
2026-cı ilin əvvəlindən bəri “Tesla”nın kapitallaşması 23,3% azalaraq 1,39 trilyon dollara düşüb.
Məryəm
