Tariyel Ağayevin adı keçən qətl işində yeni şok faktlar

Son günlərin ən səs-küylü xəbərlərindən biri 2013-cü ilin mayın 2-də öldürülən Qərb Universitetinin II kurs tələbəsi, Almaniya vətəndaşı, milliyyətcə azərbaycanlı Vüsal Şilderin qətlinin yenidən gündəmə gəlməsidir. Üstündən bir ildən çox keçməsinə baxmayaraq, qətl ətrafında yeni-yeni şok faktlar ortaya çıxmaqdadır.

Qətli gündəmdə saxlayan əsas faktorlardan biri, cinayət işində adı hallanan əsas şəxsin kimliyidir.

Bu adam eks-spiker İsa Qəmbərin, eks-prezident Heydər Əliyevin və hazırkı prezident İlham Əliyevin köməkçisi olmuş Tariyel Ağayevdir. O, hazırda Prezident Administrasiyasının Regional idarəetmə və yerli özünüidarəetmə orqanları ilə iş üzrə şöbədə məsləhətçi vəzifəsində çalışır.

İddianın ortaya çıxmasına səbəb kimi, mərhum Vüsal Şilderlə Tariyel Ağayevin qızı Lalə Ağayeva arasında eşq macərasının olmasıdır. Digər əsas faktlardan biri də, cinayətin təşkilatçılarından biri kimi adı hallanan, hazırda Dubayda biznes fəaliyyəti ilə məşğul olan Xəyal Əlizadənin Tariyel Ağayevin kürəkəni olmasıdır. Daxili İşlər Nazirliyi yaydığı açıqlamada Xəyal Əlizadənin İnterpol axtarışına verildiyini və Birləşmiş Ərəb Əmirliyində saxlanıldığını təsdiqləyib. Lakin görünən tərəf odur ki, Xəyal Əlizadə nəinki Azərbaycana təhvil verilməyib, o, hazırda sərbəst şəkildə biznes fəaliyyəti ilə məşğul olur. Bunu təsdiqləyən fakt da var –  virtualaz.org saytının əməkdaşı 20 avqustda Xəyal Əlizadənin mobil telefonuna zəng edib.  +971509495949 nömrəli mobil  telefona cavab verən X.Əlizadənin Avstraliyada olduğu bilinib.

Mərhumun anası Mətanət Şilder ölkə başçısına, Baş Prokurorluğa, Daxili İşlər Nazirliyinə, müvafiq dövlət qurumlarına və ölkə ictimaiyyətinə müraciət ünvanlayıb. O, müraciətini virtualaz.org saytının redaksiyasına göndərib. Müraciətdə zərərçəkmiş oğlunun qatillərinin hələ də məsuliyyətə cəlb olunmamasından şikayətlənib: “Mərhum oğlum Şilder Vüsal Adolf oğlunun 2 may 2013-cü il tarixdə qətlə yetirilməsindən uzun müddət keçməsinə baxmayaraq cinayətin bütün iştirakçıları, ən əsası isə Prezident Administrasiyasının işçisi Tariyel Ağayevin kürəkəni Xəyal Əlizadə və digər təşkilatçılar bu günə qədər də məsuliyyətə cəlb edilməyiblər. Xəyal Əlizadənin Azərbaycanın hüdudları daxilində axtarışa verilməsi barədə prokurorluğun müvafiq qərarı olsa da bu, formal xarakter daşıyır və gözdən pərdə asmaq üçündür. İnterpolun rəsmi internet səhifəsini təhlil etdikdə məlum olur ki, Azərbaycandan 200 nəfərə yaxın cinayətkar beynəlxalq axtarışa verilsə də, Xəyal Əlizadənin adı onların arasında yoxdur”.

Zərərçəkmiş oğlunun Almaniya vətəndaşı olduğuna görə, həmin xarici ölkənin daim diqqətində olduğunu da qeyd edib.

M.Şilder oğlunun Tariyel Ağayevin qızı Lalə Ağayevaya görə qətlə yetirildiyini bildirib: “Vüsalın 10 yaşı olanda mən Adolf Şilderlə ailə həyatı qurdum. O, Vüsala doğma atasından da yaxşı qayğı göstərdi, ona öz soyadını, Almaniya vətəndaşlığını, xaricdə təhsil verdi. Buna baxmayaraq, içində Azərbaycan sevgisi olan Vüsal Şilder Azərbaycana qayıtdı və Qərb Universitetinə daxil olaraq təhsilini davam etdirdi. 20 yaşlı oğlum Vüsal Tariyel Ağayevin qızı Lalə Ağayeva ilə tanış olur və onlar arasında məhəbbət yaranır. Vüsal mənə bunu açıb deyəndə ona bu işdən əl çəkməyi, Lalə Ağayevanın ailəsi ilə bizim ailənin maddi cəhətdən səviyyələrinin uyğun olmadığını bildirsək də, artıq hər şey gec idi və cavanlar heç kəsi eşitmək istəmirdilər”.

Zərərçəkmiş qətldən əvvəl oğlunun Lalə Ağayevadan ayrılması üçün təhdid və təqiblərə məruz qaldığını qeyd edib: “Lalə Ağayevanın valideynləri bu evliliyə razı olmayacaqlarını açıq şəkildə bildirəndən sonra oğluma dəfələrlə xəbərdarlıq olunmuş, onu təhdid etmişdilər. İş o yerə çatmışdı ki, oğlumun guya narkoman və cinayətkar olmasını Lalə Ağayevaya sübut etmək və Vüsalın şəxsiyyətini aşağılamaq üçün maşınına narkotik maddə atılması, tutularaq polis bölməsinə aparılması, orada bu məsələnin ictimaiyyətə çatdırılması üçün geniş bir plan qurulmuşdu.

Bu plan Tariyel Ağayevin qohumu, polis əməkdaşı İlham Məmmədov tərəfindən icra olunmuşdu. İlham Məmmədov, Qurban Novruzov, Yaşar Şümer və Kənan Babayevin işi hazırda Binəqədi Rayon Məhkəməsinin hakimi Vüqar Məmmədovun icraatındadır. Cinayət işindən də göründüyü kimi, oğlumun qətlə yetirilməsinə qədər onun təqib olunması, yol-nəqliyyat hadisəsinin törədilməsi, maşınına narkotik maddə atılması, cəmiyyətə narkoman və cinayətkar kimi təqdim edilməsi işini təşkil etmək və həyata keçirmək üçün polis işçilərindən və digər şəxslərdən ibarət cinayətkar qrup uzun müddət və planlı şəkildə iş aparıb. Amma bu niyyətlərini də həyata keçirə bilməyənlər ən alçaq yola əl ataraq oğlumu vəhşicəsinə qətlə yetiriblər”.

Almaniya vətəndaşı Mətanət Şilderin sözlərinə görə, istintaq düzgün aparılmayıb. İstintaq zamanı həm onların, həm də iş üzrə qanuni nümayəndəsi Aslan İsmayılovun hüquqları kobud şəkildə pozulub. O, bildirib ki, cinayətdə şahid qismində iştirak etməli olan insanlardan Lalə Ağayevanın adı ümumiyyətlə, şahidlər siyahısına salınmayıb. Zərərçəkmiş bununla bağlı dəfələrlə aidiyyəti orqanlara müraciət etsə də, cavabsız qaldığını söyləyib.

M.Şilder müraciətdə bildirib ki, Tariyel Ağayevin qızı oğlunun qətlində atasının əlinin olduğunu etiraf edib: “Vəfa mənə dedi ki, oğlumu onun əri Xəyal öldürməyib, bu qətlin arxasında atası Tariyel Ağayev dayanır. Vəfa məndən sakitləşməyi xahiş etdi, dedi ki, daha olan olub, keçən keçib, sənin oğlunu daha heç nə, heç kim geri qaytara bilməz. Mən isə öz növbəmdə dedim ki, əgər sənin ərin Xəyal Əlizadənin heç bir günahı yoxdursa və bu qətlin arxasında dediyin kimi, yalnız Tariyel Ağayev dayanırsa, onda qoy ərin Xəyal Bakıya qayıdıb bu dediklərinizi məhkəmədə də təsdiqləsin”.

Mərhumun anası ilə qətlin təşkilatçısı kimi adı hallanan Xəyal Əlizadə arasında olan SMS yazışması mətbuatda yayılıb. Açıq şəkildə Xəyal Əlizadə Mətanət Şilderi ən ağır küçə söyüşləri ilə təhqir edərək, qətlə yetirilən oğlunun goruna söyməkdən çəkinməyib. Ardınca da o, Mətanət Şilderi təhdid edərək, şikayətinə son qoymağı tələb edib.

Onu da qeyd edək ki, bu qətldə adları hallanan Tariyel Ağayev və İlham Məmmədovun törətdikləri iddia edilən qətl hadisəsi təkcə bununla bitmir. Onlar 2011-ci il iyunun 5-də müəmmalı şəkildə dünyasını dəyişən polis zabiti Nofəl Dadaşovun ölümündə də suçlanırlar. Bununla bağlı dəfələrlə mətbuata açıqlama verən mərhumun atası Qəzənfər Dadaşov oğlunun elektrik cərəyanı vurmasından yox, Tariyel Ağayev tərəfindən öldürülməsindən şübhələndiyini bildirib: “Oğlum İlham Məmmədovla dostluq edirdi. Hətta onu Qubadan istirahətdən Bakıya təcili qayıtmağa da İlham vadar edib. Oğlum onunla görüşəndən az müddət sonra mənə zəng gəldi ki, elektrik cərəyanı vurub. Hadisə yerində İlham özünü çox şübhəli aparırdı. Gah deyirdi, hadisə yerində olmuşam, gah da olmadığını deyirdi. Vüsal Şilderin qətlində İlham Məmmədovun adı hallanandan sonra mənə hər şey aydın oldu.

 Həmin qətldə də Tariyel Ağayevin adı çəkilirdi. Hətta mərhumun anası oğlunun Tariyel Ağayevin sifarişi əsasında qətlə yetirilməsi ilə bağlı müsahibələr verirdi. Tariyel Ağayev və İlham Məmmədov arasında yaxın münasibət, qohumluq əlaqəsi olub. Onunla münasibətim gərgin olub və ondan hər an zərbə gözləmişəm. Bərdə Yağ Pendir Zavodunun 2003-cü ilə qədər rəhbəri olmuşam. 2002-ci ildən başlayaraq, Tariyel Ağayev mənə şəriklik təklif edirdi. Əvvəllər razı olmasam da, sonradan razılaşdım. Bütün müsibətlər bundan sonra başıma gəldi”.

Sonda onu qeyd edək ki, Vüsal Şilderin qətli ilə bağlı aidiyyəti dövlət qurumları ilə əlaqə saxlamağa çalışsaq da, mümkün olmadı. Bu məsələ ilə bağlı mövqe bildirmək istəmədilər. Qeyd edək ki, V.Şilderin atalığı Adolf Şilder bir vaxtlar “Mercedes Benz”in Azərbaycan üzrə nümayəndəliyinin rəhbəri vəzifəsində çalışıb. Bu qətllə bağlı Almaniyanın baş kansleri Angela Merkel də məlumatlandırılıb. Almaniya qanunlarına görə, əgər onun vətəndaşı hər hansı ölkədə öldürülürsə cinayətkar tapılana kimi iş davam etdirilir. Almaniyanın kriminal polisi də bu işə nəzarət edir.

Mövzuya yenidən qayıdacağıq.