Azərbaycanın işğal edilmiş Qarabağ bölgəsinə qanunsuz səfər edən Ermənistan lideri Serj Sərkisyan ötən gün bu ərazidə yerləşdirilən qeyri-qanuni silahlı qruplar qarşısında çıxış edərkən Dördgünlük savaşı bir daha yada salması və işlətdiyi ifadələrlə diqqət çəkdi.

Axar.az xəbər verir ki, Sərkisyan Aprel savaşında “Azərbaycanın planını pozmağı və informasiya müharibəsində qalib gəlməyi” bacardıqlarını bildirməklə, erməni hərbi-siyasi elitasında, o cümlədən ictimai rəydə daşlaşmış məğlubiyyət sindiromundan çıxa bilmədiklərini bir daha nümayiş etdirdi.
Yada salaq ki, bundan öncə də Sərkisyan 2-6 aprel döyüşlərində Ermənistan ordusunun geri çəkilmədiyini və böyük itkilər vermədiyini dəfələrlə iddia etmişdi.

Məsələyə münasibət bildirən politoloq Elxan Şahinoğlu Sərkisyanın və Ermənistan rəhbərlərinin bu tip uğursuz cəhdlərinə “Aprel atəş(kəs)i” kitabında məntiqli arqumentlə cavam verib. Politoloq vurğulayıb ki, Sərkisyan 2016-cı il aprelin 26-da, yəni Dördgünlük savaşdan 20 gün sonra ordu rəhbərliyində ciddi kadr dəyişiklikləri etdi: “Ermənistan prezidentinin fərmanı ilə müdafiə nazirinin müavini, nazirliyin maddi-texniki təminat departamentinin rəisi Alik Mirzəbekyan, rabitə qoşunlarının rəisi, Müdafiə Nazirliyinin Rabitə və avtomatlaşdırılmış idarəetmə sistemləri idarəsinin rəisi, general-mayor Komitas Muradyan və Ermənistan Silahlı Qüvvələri Baş Qərargahının kəşfiyyat idarəsinin rəisi, general-mayor Arşak Karapetyan vəzifələrindən azad edildilər. Bu generalların işdən çıxarılması o demək idi ki, əslində Ermənistan prezidenti 2-6 aprel tarixlərindəki döyüşdə ordunun geri çəkildiyini və ciddi itkilər verdiyini etiraf edir”.