Azərbaycan mediasında dezinformasiyaların qarşısı alınacaq
Azərbaycan-Slavyan Gəncləri Assosiasiyasının sədri, Xeber1.az saytının baş redaktoru Səbuhi ABBASOV AİM.az saytının suallarını cavablandırıb.
– Səbuhu müəllim, “Gənc jurnalistlərin internet təhlükəsizliyi forumu” layihəsinin təşkilində məqsəd nədir?
– 2014-cü ilin avqust ayında cəbhə xəttində baş verən gərginlik və ölkə mediasında, xüsusilə də online mediada yayılan dezinformasiya ilə bağlı həyacan siqnalı çalındı. Bu sahədə ciddi maarifləndirməyə ehtiyac var idi. Məqsədimiz online mediada çalışan gənc jurnalistləri dezinformasiya və onun qarşısının alınması, sosial şəbəkələrdən gələ bilən mümükün təhlükələr, ölkəmiz haqqında xarici mətbuatda böhtan tipli məlumatların yayılması və digər mövzularda bilgiləndirməklə dezinformasiyaların qarşısını almaqdır.
Bu istiqamətdə biz ilk dəfə olaraq layihə həyata keçiririk. Layihə çərçivəsində artıq Bakı Slavyan Universitetində “İnformasiya Təhlükəsizliyi: problemlər və perspektivlər” adlı tədbir həyata keçirilib. Layihə çərçivəsində proqramlar hazırlanıb, mediada bu istiqamətdə məlumatlar verilib. Bildiyiniz kimi, çağdaş dünyamızda informasiya təhlükəsizliyi xüsusi əhəmiyyət daşıyır. Bu xüsusi diqqət tələb edən vacib sahədir.
Layihənin “www.internet-security.club” adlı xüsusi internet saytı da yaradılıb. Bu da imkan veriri ki, layihə bitdikdən sonra da gənc jurnalistlər bu istiqamətdə məlumat ala bilsinlər.
Gənc jurnalistlərə “internet təhlükəsizliyi” mövzusunda təlimlər keçiriləcək
– Form çərçivəsində daha hansı tədbirlər planlaşdırırsız?
– Ölkənin nüfuzlu media nümayəndələrinin rəhbərləri ilə görüşlər nəzərdə tutmuşuq. Yayda keçirilməsini planlaşdırdığımız üç günlük forumda Azərbaycanın media mütəxəssisləri gənc jurnalistlərə “internet təhlükəsizliyi” mövzusunda təlimlər keçəcəklər.
Tələbə jurnalistlərlə də görüşlər nəzərdə tutmuşuq. Artıq Bakı Slavyan Universitetində bu görüş keçirilib. Nəzərdə tutduğumuz növbəti görüşü isə Bakı Dövlət Universitetində planlaşdırmışıq.
– “Gənc jurnalistlərin internet təhlükəsizliyi forumu” layihəsin gözləntiləriniz nədir?
– Gözləntimiz bu istiqamətdə tədbirlərimizi davamlı olaraq həyata keçirməklə mövcud boşluğu aradan qaldırmaqdır. Bu layihə uzunmüddətli nəticələrə hesablanmış layihədir.
Asif MEHMAN,
AİM.AZ
Son şərhlər