Fransada aparılan bir araşdırma qazlı içkilərin və ya çayın şüşə butulkalarında plastik və ya metal qutulardan daha çox mikroplastik ehtiva etdiyini ortaya çıxarıb.
Elchi.az xəbər verir ki, Fransa Qida Təhlükəsizliyi Agentliyi (ANSES) tərəfindən nəşr olunan yeni araşdırma mikroplastiklərlə bağlı həyəcan verici tapıntıları vurğuladı. Journal of Food Composition and Analysis jurnalında dərc edilən araşdırmaya görə, şüşə butulkalarda satılan içkilərdə litrdə orta hesabla 100 mikroplastik hissəcik aşkar edilib. Bu miqdar plastik butulka və bankalarda olan məbləğdən 5-50 dəfə çox ola bilər.
Alimlər şüşə butulkaların insanların düşündüyü kimi “təmiz” olmadığını, bu şüşələrin qapaqlarındakı boya və plastik birləşmələrin içkini birbaşa mikroplastiklərlə çirkləndirə biləcəyini deyirlər.
Sağlamlığa təsiri araşdırılır
Mikroplastiklər insan saçının qalınlığından belə kiçik hissəciklərdən ibarətdir. Təbiətdə plastik tullantıların parçalanması nəticəsində əmələ gələn bu hissəciklər nəfəs aldığımız hava və yediyimiz qidalarla bədənimizə daxil ola bilir. Mütəxəssislər xəbərdarlıq edir ki, bu hissəciklər insult, hormon pozğunluqları və bəzi xərçəng növləri ilə əlaqəli ola bilər.
Yeni araşdırma mikroplastiklərin sağlamlığa təsirini birbaşa açıqlamasa da, şüşə butulkaların göründüyü qədər günahsız olmaya biləcəyini göstərir.
Şayəstə Hüseynova
