NATO-nun baş katibi Yens Stoltenberq Çinin NATO qonşularını qorxutduğuna və Tayvanı təhdid etdiyinə görə, Yaponiya və digər demokratik ölkələrin beynəlxalq asayişi qorumaq üçün alyansla işləməsinin vacibliyini vurğulayıb.
Elchi.az xəbər verir ki, Tokioya səfər edən Stoltenberq Çinin bu addımını NATO və Yaponiya üçün kritik an adlandıraraq, Çin və Rusiyanın beynəlxalq nizama avtoritar təzyiq göstərdiyini söyləyib.
Onun sözlərinə görə, transatlantik və Hind-Sakit okean təhlükəsizliyi bir-birinə dərindən bağlıdır.
Stoltenberq Yaponiyanın baş naziri Fumio Kişida ilə birgə mətbuat konfransında qeyd edib:
“Çin baş verənləri diqqətlə izləyir və gələcək qərarlarına təsir edə biləcək “dərslər” alır. Çin nüvə silahı da daxil olmaqla silahlı qüvvələrini əhəmiyyətli dərəcədə artırır, Tayvanı təhdid edir, mühüm infrastruktur obyektlərinə nəzarət etməyə çalışır, NATO və Ukraynadakı müharibə haqqında dezinformasiya yayır. Çin bizim rəqibimiz deyil, lakin biz problemin miqyasını anlamalı və onu həll etmək üçün birlikdə çalışmalıyıq”.
Qeyd edək ki, artıq ABŞ-ın yaxın müttəfiqi olan Yaponiya son illərdə Hind-Sakit okean regionunun digər ölkələri, eləcə də Böyük Britaniya, Avropa və NATO ilə hərbi əlaqələrini genişləndirib.
Yeganə
Son şərhlər