SOCAR səhmlərini satışa çıxara bilər

Lakin bunun üçün şirkətlərin görəcəyi bir çox işlər var ki, bunlardan əsası korporativ idarəetmə standartlarının tətbiqi, şəffaflığın artırılması, maliyyə açıqlığının təmin olunmasıdır. SOCAR bu gün bu standartlara cavab verir. Buna görə bir gün SOCAR səhmlərinin müəyyən hissəsini satışa çıxara bilər. Lakin digər şirkətlər hələlik buna hazır deyil”, deyə o bildirib.

Ekspertlər musavat.com-a SOCAR-ın bu addımı atmasını səbəblərini və bunun nə dərəcədə mümkünlüyünü açıqlayıblar. Ekspert Elşad Məmmədov musavat.coma-a bildirib ki, SOCAR-ın səhmlərinin satışa çıxarılması ilə bağlı qərar şirkətdə maliyyə  resurslarına tələbatın artması ilə əlaqədardır: “Belə ki, SOCAR son illər ərzində həm ölkə daxilində, həm də xaricdə kifayət qədər aktiv sərmayə siyasəti aparmaqdadır. Eyni zamanda, şirkətin borcları böyük rəqəmlərlə ifadə olunur. Neftin  qiymətinin kəskin şəkildə enməsi isə sözsüz ki, şirkətin maliyyə  vəziyyətini daha da mürəkkəbləşdirir. Bu vəziyyətdə qurumun menecmenti bir tərəfdən xərclər paketini azaltmağa, digər tərəfdən isə gəlirlərin artırılmasına çalışır. Düşünürəm ki, böyük  ehtimalla, yaxın aylarda qurum tərəfindən hökumət qarşısında şirkətin istehsal etdiyi məhsulların qiymətlərinin artırılması məsələsi qaldırılacaq”.

Ekspert Natiq Cəfərli isə musavat.com-a deyib ki, SOCAR-ın səhmlərinin bir hissəsi satışa çıxarıla bilər:“İnanmıram ki, burada böyük səhm paketindən söhbət gedir. SOCAR-ın özünün vəziyyəti ölkənin vəziyyətindən pisdir. SOCAR çox ciddi şəkildə borclanıb. Yeni layihələrə də imza atıb öhdəliklər götürüb. Yeni layihələrin maliyyələşmə mənbəyini tapa bilmir. Gah Şərqdən, gah Qərbdən, bir çox ölkələrdən maliyyə tapmağa çalışır. Beynəlxalq institutlara da müraciət edib ki, kredit alsın. Son danışıqlar Yaponiya ilə oldu və baş tutmadı. İndi Cənubi Koreya ilə danışıqlar gedir. Türkiyə bankları ilə də danışıqlar gedir. SOCAR-ın ciddi maliyyə resurslarına ehtiyacı var. Böyük yatırımlar etməlidir.  Düşünürəm ki, problemin kökündə həm də bu, dayanır. Ölkədəki problemlərin ciddiliyi bir qırağa, SOCAR-ın özünün problemləri çox böyükdür. Səhmlərinin bir hissəsini satmaqla o problemləri həll etməyə, borcların bir hissəsini qapatmağa və yaxud götürdüyü öhdəlikləri yerinə yetirmək üçün maliyyə mənbələri tapmağa çalışır.

Əsasən buna hesablanmış addımdır. Amma bu, qısa müddətdə  mümkün deyil. SOCAR-ın səhmləri dövlətin nəzarətindədir. SOCAR-ın ümumi kapitallaşmasının dəyərləndirilməsi bu günə qədər yoxdur. Ciddi beynəlxalq konsaltinq şirkətləri bunu qiymətləndirməlidir, SOCAR-ın bazar dəyəri müəyyənləşməlidir. Bundan sonra proses gedə bilər. Bu da kifayət qədər zaman ala biləcək məsələdir. Düşünürəm ki, qısa zamanda bu, mümkün görünmür. Amma ən azından, SOCAR-ın problemləri dərinləşsə, götürdüyü öhdəliklər üçün maliyyə mənbələri tapılmasa, məcburən bu addıma gedəcəklər. SOCAR-ın səhmlərinin bir qismi satışa çıxarıla bilər”.