Ekspertlər Rusiyaya qarşı sanksiyanın Azərbaycana da təsir göstərəcəyini vurğulayır
Avropa Birliyi avqustun 1-dən etibarən Rusiyaya sektorial sanksiya, yəni bank sektoruna sanksiya tətbiq edib. Ölkənin 5 iri bankı – Sberbank, VTB, Qazprombank, VEB və Rosselxozbank bu sanksiyaların qurbanına çevrilib. Avqustun 1-dən etibarən adıçəkilən bankların Avropa bazarına çıxışı məhdudlaşdırılıb. Sanksiyanın nəticəsi olaraq bu bankların və onların törəmə qurumları AB-dən 90 gündən çox olan müddətə borc və səhmdar kapitalı cəlb edə bilməyəcəklər.
Ekspertlər bu sanksiyaların Azərbaycana da təsirsiz ötüşməyəcəyini vurğulayırlar. İqtisadçı Samir Əliyevin sözlərinə görə, sanksiyaya düşən banklar arasında bir bank xüsusilə diqqət çəkməyə bilməz: “Söhbət Bank VTB-dən gedir. Çünki Rusiyanın ikinci ən böyük bankı olan VTB-nin Azərbaycanda da törəmə qurumu var. Deməli, AB-nin sanksiyası həm də Azərbaycandakı VTB bankına şamil edir. Bundan sonra Bank VTB Avropa institutlarından borc ala bilməyəcək”.
Ekspert qeyd edir ki, Rusiyaya, o cümlədən bank sektoruna tətbiq edilən sanksiya Azərbaycanda öz təsirini ilk növbədə Neft Fondunun timsalında hiss edəcək: “Ona görə ki, Neft Fondu VTB bankın səhmdarlarında biridir. Fond ötən il 500 milyon dollar müqabilində Bankda təxminən 3 faizlik paya malik olmuşdu. Baş verən hadisələr fonunda VTB bankının səhmlərinin ucuzlaşması və bununla da Neft Fondunun zərərə düşəcəyi istisna deyil. Digər zərbə fondun aktivləri ilə bağlıdır. Fondun aktivlərində rus rublunun payı 1,3 faizdir. Yəni 16,3 milyard rubl həcmində vəsait ehtiyatlara daxil edilib. Rubl isə son aylar kəskin ucuzlaşır. 2014-cü ildə valyuta rəsmi olaraq 9 faizdən çox ucuzlaşıb. Sanksiyaların təsiri olaraq rublun ucuzlaşması davam edəcək. Deməli, faktiki olaraq fondun 1 milyard dollar həcmində vəsaiti sanksiyaların təsiri nəticəsində dəyərini əhəmiyyətli dərəcədə itirmək təhlükəsi ilə üzləşib”.
S.Əliyev həmçinin qeyd edib ki, Rusiyada investisiya mühitinin pisləşməsi güman ki, daşınmaz əmlak bazarına da zərbə vuracaq: “Bu zərbə nəticəsində sözsüz ki, fondun bir neçə il öncə Tverskaya, 16 ünvanında yerləşən və 133 milyon dollara aldığı biznes mərkəzini də vuracaq. Rusiyaya tətbiq edilən sanksiyalar, o cümlədən sonuncu sektorial sanksiyalar təəssüf ki, Azərbaycana təsirsiz ötüşməyəcək. Sanksiyalar sərtləşdikcə onun mənfi təsiri Azərbaycanda daha çox hiss olunacaq”.