Sabiq nazirdən Bakıya ərəb axını ilə bağlı ilginc iddia

Sabiq maliyyə naziri Fikrət Yusifov sosial şəbəkədəki şəxsi səhifəsində ərəblərin Bakıya axın etmələrindən narahatlığını ifadə edən fikirlər paylaşıb. O bildirib ki, yaxın bir dostu Yeni ilə bir neçə gün qalmış Dubaydan Bakıya dönərkən təyyarədə sərnişinlərin 80%-dən çoxunun ərəblər olduğunun şahidi olub: “Həmin ərəblər Yeni ili Azərbaycanda qarşılamağa gəlirlərmiş. Bir tərəfdən bu çox yaxşı haldır. Hər birimiz postneft dövründə ölkəmizdə turizmin sürətli inkişafını istəyirik. Ancaq nədənsə, bu ərəblərin Azərbaycana axını artdıqca mənim içimdə narahatlıq da böyüyür. Çünkı bunlar olan yerdə sabitlik olmur. Bütün bunların kökündə isə onların təbiət etibarılə cahil olmaları dayanır. Bir baxın ərəb dünyasına, görün bu gün orada nələr baş verir? Düşünürəm onları məsafədə saxlasaq daha yaxşı olar…”

Doğrudan da, turist kimi Bakıya gələn ərəblərin sayında bu ilin yay aylarından etibarən artım müşahidə olunur. Bunu rəsmi rəqəmlərdən də görmək olur. Belə ki, Mədəniyyət və Turizm Nazirliyinin  yaydığı məlumatda qeyd edilir ki, Birləşmiş Ərəb Əmirliklərindən (BƏƏ) ölkəmizə gələn turistlərin sayında 2015-ci ilin müvafiq dövrü ilə müqayisədə 2016-cı ilin birinci yarım ili ərzində 10 086 nəfər olmaqla, 19 dəfə, Bəhreyndən gələn qonaqların sayında 2016-cı ilin birinci yarım ili ərzində 422 nəfər olmaqla, 13 dəfə artım qeydə alınıb. Bununla yanaşı, ərəb ölkələri arasında ən yüksək artım tempi İraqda qeydə alınıb. Ötən ilin ilk altı ayı ərzində 11 028 nəfər İraq vətəndaşı ölkəmizə səfər edib ki, bu da əvvəlki ilin yanvar- iyun aylarındakı göstəricilərdən (376 nəfər) 30 dəfə çoxdur. 2016-cı ilin birinci yarım ili ərzində ərəb ölkələrindən Azərbaycana səfər edən xarici vətəndaşların sayı ümumilikdə 25 min nəfər təşkil edib ki, bu da 2015-ci ilin müvafiq dövrü ilə müqayisədə (3158 nəfər) təxminən 22 min nəfər (8 dəfə) çoxdur.

“Yeni Müsavat”a Fikrət Yusifov fikrini daha geniş formada aşağıdakı kimi əsaslandırıb: “Onların iqtisadi baxımdan faydaları var, bu, öz yerində. Ancaq məsələ burasındadır bizim harada zəmanətimiz var ki, səhəri gün İŞİD-ə aid olan insanlar bu ərəblərin arasında ölkəyə daxil olub, hər hansı bir təxribat törətməyəcəklər. Bu qaydada ərəblər artıq Avropaya da axın edirlər və terrorların araşdırılmasında bəlli oldu ki, terrorçular ərəb axınının içərisinə qoşulub gəliblər. Ərəb dedikdə mən təkcə Səudiyyə Ərəbistanını nəzərdə tutmuram. 20 ərəb dövləti var və mən də bütövlükdə bu cəbhəni nəzərdə tuturam. Camaatı qəfəsə salıb yandırmaq, başını kəsib videoya çəkib, sonra da onu internet vasitəsilə yaymaq nə İslamda var, nə də qeyri bir dində. Belə götürəndə bunların heç bizə xeyri də lazım deyil, ziyanlarını da istəmirik. Ərəblərin çoxalması istər-istəməz adamın içində narahatlıq yaradır. Sosial şəbəkələrdə bu məsələ ilə bağlı təkcə mən deyil, onlarla oxşar fikir bildirənlər var. Çünki hər kəsdə eyni hissləri yaradırlar. Bu gün guya sakit gəliblər və hər hansı bir iğtişaş hadisəsi törətmirlər. Ancaq şəhərin ortasında elə hərəkətlər edirlər ki, onu heç ifadə etməli deyil. Bu şəhərdə çox biabırçı işlərlə məşğuldurlar. Narahatlığımın əsas səbəbi ondan ibarətdir ki, bu gün dünyada baş verən terrorun mərkəzində bunlar dayanıblar. Dubaydan gələn ərəblərin hamısı oralı deyil. Orada hava limanı olduğu üçün bütün ərəb ölkələrindən Dubaya gəlib, oradan da Azərbaycana yollanırlar. Bu insanlar mahiyyət, təbiət etibarı ilə sakit deyillər”.

Ərəblərin ölkə üçün nə qədər təhlükəli olub-olmaması ilə bağlı təhlükəsizlik üzrə ekspert Arzu Nağıyevin də fikirlərini aldıq. A. Nağıyev “Yeni Müsavat”a bildirdi ki, hər hansı bir kontingentin artmasının sonu yaxşı olmur: “Misal üçün, vaxtilə belə bir kontingentin çinlilərlə bağlı olması demək olar ki, bütün dövlətlərin ərazisində ”Çayna-taun”ların yəni Çin mini şəhərlərinin yaradılmasına gətirib çıxardı. Onlar da öz qanunları ilə idarə olunan icmalara çevrildilər. Məhz ərəb dövlətlərindən bura turistlərin gəlməsi düşünürəm ki, bu gün Ərəbistanda baş verən hadisələrlə, “Ərəb baharı” ilə uzlaşsa, bu, böyük problemlərin yaranmasına səbəb ola bilər. Məhz buna görə də gələn turistləri kimliyindən asılı olmayaraq xüsusi xidmət, hüquq-mühafizə orqanları, cavabdeh turist təşkilatları hərtərəfli yoxlamalıdırlar. Onların nə məqsədlə gəlmələri və digər bu kimi arqumentlər də xüsusi olaraq nəzarətdə saxlanmalıdır. Gələcəkdə ərəb dövlətindən gələn şəxslərin hər hansı bir təhlükə yaratması məsələsini də hesab edirəm ki, o qədər də qabartmaq da düzgün deyil. Lakin təkcə ərəb dövlətləri deyil, ümumiyyətlə, Azərbaycana gələn axından, kütlədən onun dinindən və millətindən asılı olmayaraq hər tərəfli qorunmalı, ehtiyatlı davranılmalıdır. Hətta müəyyən məqamlarda onların özlərinin də təhlükəsizliyi təmin edilməlidir. Məlumdur ki, ərəb dövlətlərindən gələnlərin arasında dini inanc baxımından da müxtəlif fikirliləri var. Bunlar da nəzərə alınmalıdır”.