Səudiyyə Ərəbistanında keçiriləcək 2034-cü il futbol üzrə dünya çempionatının müddətini, yarışın müsəlmanlar üçün müqəddəs Ramazan ayına və ya yay istilərinə təsadüf etməməsi üçün 2035-ci ilə keçirmək məcburiyyəti yaranalar bilər.
Elchi.az xəbər verir ki, bu fikri “Politico” nəşri irəli sürüb.
Nəşr yazır ki, kəskin istilər səbəbindən turnirin yayda keçirilməsi ehtimalı aşağıdır. “Politico” qeyd edir ki, 2034-cü ildə Ramazan ayı noyabrın 12-si radələrində başlayacaq və dekabrın 12-də başa çatacaq. Martın əvvəlində isə təxminən 2 milyon insan İslamın müqəddəs məkanlarını ziyarət etmək üçün illik Həcc ziyarəti çərçivəsində Səudiyyə Ərəbistanına yola düşəcək.
2034-cü ilin yanvar və fevral ayları da dünya çempionatı üçün uyğun olmaya bilər, çünki həmin vaxt ABŞ-nin Solt-Leyk-Siti şəhərində Qış Olimpiya Oyunları keçiriləcək və bu, “ictimaiyyətin diqqətini və sponsorların vəsaitlərini başqa tərəfə yönəldə bilər”. “Politico”nun fikrincə, belə bir vəziyyətdə dünya çempionatının 2035-ci ilin əvvəlində keçirilməsinə qərar verilə bilər. Qeyd olunur ki, Beynəlxalq Futbol Federasiyası (FİFA) belə bir addımın nəzərdən keçirildiyini bildirməyib, lakin nəşrin qənaətinə görə, bu ssenarini istisna etmək olmaz.
Futbol üzrə dünya çempionatı adətən yayda keçirilir, lakin 2022-ci ildə ev sahibi Qətərdəki yüksək temperatur səbəbindən o, ilk dəfə payız-qış mövsümündə baş tutub.
Məryəm
