“Estetik Kosmetologiya Mütəxəssisləri” İctimai Birliyinin sədri Rəna Soltanova yeni layihə həyata keçirir. Tam təmannasız nəzərdə tutulan layihə çərçivəsində qazi, şəhid ailələri və sağlamlıq imkanları məhdud qadınlar kosmetologiyanın bütün dərinliklərini öyrənərək yeni peşəyə sahib olmaq imkanları qazanacaqlar.
Elə bu münasibətlə yenicag.az “Estetik Kosmetologiya Mütəxəssisləri” İctimai Birliyinin sədri Rəna Soltanova ilə həmsöhbət olub.
Elchi.az həmin müsahibəni təqdim edir:
– Həyata keçirdiyiniz layihə barəsində məlumat verərdiniz.
– Bizim QHT “Estetik Kosmetologiya Mütəxəssisləri” İctimai Birliyi adlanır. Layihəmiz iki həftədir ki, başlayıb. Üç ildi fəaliyyətə başlayıb. Biz bu layihəni çoxdan fikirləşirdik. Bu il həyata keçirmək qismət oldu. Layihənin məqsədi qadınların öz ayaqları üzərində dayanmağıdır. 10 ildir ki, klinika açmışam. Bu müddətdə bir çox qadına dəstək olmuşam. Amma bu heç vaxt layihə şəklində olmayıb. Yəni, sırf qazi, şəhid ailələri üçün olmayıb. Yanımda öyrətmişəm xanımlara. Qalan qalıb yanımda işləyib, gedən də başqa yerdə işini davam etdirib. Qərara gəldik ki, tam təmannasız xanımlara praktik dərslər keçirək. 13 qadından ibarət olan qrupumuzun içərisində 2 nəfər həkim var. Digərlərinin peşəsi həkim deyil. Kosmetalogiyanın digər növlərini öyrənəcklər.
– Bu proqram ödənişsizdirmi?
– Bəli. Tamamilə ödənişsiz.
– Bu şəxslər daha sonra işlə təmin olunacaqmı?
– Kömək edəcəm. Tanışlarım da var ki, bu işdə onların da dəstəyini görəcəm. Ümumiyyətlə, savadlı kadrlara həmişə ehtiyac var. Mən yardım etməsəm də onlar iş tapacaqlar. Amma əvvəldən özümə söz vermişəm ki, xanımlarımıza iş tapmalarında yardımçı olacam.
– Bu layihə nə qədər davam edəcək?
– Layihə 2,5 ay davam edəcək, bu müddət ərzində qadınlarımız kosmetologiyanın həm də praktikada öyrənəcəklər.
– Dərslər hansı saat aralığında keçirilir?
– Dərslərimiz həftədə 2 dəfə bu klinikada saat 11-dən – 17:00-a qədər, keçirilir. Xanımlar kosmetalogiyanın nəzəriyyə və praktikasını öyrənirlər.
– Xanımlar praktikadan razıdırlar?
– Əlbəttə, çox razı qalırlar. Yüz dəfə təşəkkür edirlər bizə. Nə sual verirlərsə cavablandırırıq. Həmçinin nə ehtiyacları olsa da əlimizdən gəldiyi qədər kömək oluruq.
– Maraqlıdır, bu ideya hardan ağlınıza gəldi?
– Hər zaman ehtiyacı olan insanları yanımda görmək istəmişəm. Hər kəs dövlətə xidmət etməlidir. Bu layihə də vətənə xidmətdir. Bacardığım qədər xanımlara kömək etməyə çalışıram. Güclü qadınları görmək məni xoşbəxt edib. Mənə görə, qadınlar nə qədər güclü olarsa, dövlət də bir o qədər güclü olar.
– Bu layihədən sonra planlarınız nədir?
– Davamlı olaraq bu layihəni həyata keçirmək bir az çətin olar. Təqribi 10 müəllim dərs keçir. Zaman, otaq ayrılır. Dərslər keçirilir. Dərsdə istifadə edilən kosmetik ləvazimatlar bizim klinika tərəfindən qarşılanır. Ona görə də fasiləsi etmək çətin olar. Məsələn ildə 1 ya 2 dəfə etmək olar
– Allah yolunuzu açıq etsin.
– Çox sağ olun.
Son şərhlər