“Qoy onlar son qəhrəmanlarımız deyil, sonuncu şəhidlərimiz olsunlar!”

Oxucularımıza çox nəfis bir tərtibatda yeni çap olunan “Şəhidlik Zirvəsi” kitabını təqdim edirik. Vətən torpaqları uğrunda canını qurban vermiş şəhid Amil Novruz oğlu Əliyevdən bəhs edən kitabda, ayrı-ayrı müəlliflərin qələmə aldığı yazılar toplanmışdır. Aqil Alışovun “Şəhid şikəstəsi” yazısı ilə başlayan bu kitabda, yazı müəllifinin Fransa xalqının dahi sərkərdəsi Napaleonun müdrik kəlamını diqqətinizə çatdırmaq istəyirəm: “Şəhidləri şəhid edən ölümləri deyil, ölümlərinin səbəbidir”. Beləcə, kitabı varaqladıqca, şəhidlik zirvəsi adına uyğun olaraq: “Mübariz kimi şəhid olmaq arzusu” (Ramin Deko, Azadlıq qəzeti), “Yollar şahid oldu” (Qədiməli Ağayev), “Sonuncu şəkil” (İdris Şükürlü, Milli qürur qəzeti), “Vətənə sipər oğul” (Samir Qurbanov, Region-Press qəzeti) kimi müəllif yazıları bir-birini tamamlayır. Ədəbi- publisit yazılarla bir-birini əvəz edən bu kitabda milli qürur hissi, vətən sevgisi, mübarizlik, qəhrəmanlıq qeyd olunan bütün müəllif yazılarında ön planda dayanır. Eləcə də, bu kitabda 24 yaşlı şəhid qəhrəman Amil Əliyevin ömür yolu, müəllif yazılarında və kitab səhifələrində əksini tapmış, foto-albom vasitəsi ilə ətraflı şəkildə oxuculara təqdim olunmuşdur.
Kitab səhifəsindəki foto-albomda diqqət çəkən məqamlardan biri də, şəhidimizin oğlu balaca Yusifin atasının məzarını gül dəstəsilə ziyarət etməsidir. Bu il sentyabrın 22-də balaca Yusif 4 yaşını qeyd etdi, onun ad günündə doğmaları, əzizləri, bir sözlə, hər kəs vardı, amma… Uşaq xəyallarında, yenə də “atam gələcək, mənə tapança alacaq”-deyə, qürurlu, şirin kəlmələriylə qəlbləri dağlayır, ürəkləri yandırırdı, Yusif. Biz də təbrik edirik, müqəddəs Yusif adının qoyulduğu gün mübarək, deyirik!..
Tofiqə bibinin hər addımbaşı şirin sözü-söhbətidir, sənin xatirəyə dönmüş kəlmələrin, Amil. O kəlmələrin ki, bu gün öz yerini, öz əksini tapdı həyatda:

– Bibi qurban, sən gizirsən, təzə gələn əsgərlərimizdən muğayat olursuz? Axı onlar hələ xidmətin nə olduğunu bilmirlər…

–Əlbəttə, bibican, bu gün əsgərlərimizin də, gizirlərimizin də, zabitlərimizin də qarşıya qoyduğu bir məqsəd var, düşmən üzərində qələbə çalmağa hər an hazır olmaq. Mən də bu hisslərlə yaşayıram, o mənfur yağıların üzərinə sonadək gedəcəyəm…
Amil Əliyev dostlarına sədaqətli olmaqla bərabər, vətən torpaqları üçün həmişə narahat idi. Qəlbinin dərinliyindəki nigarançılıq hissi  onu rahat buraxmırdı. Müəllif yazılarının birində qeyd olunduğu kimi: “Sabahısı gün, yəni iyunun 5-də bacısının gəlin köçəcəyini bilsə də, o, iyunun 4-də hərbi hissəyə yola düşdü.” Hətta ata-anası bircə gün qalıb şənlikdə iştirakını istəsələr də, o, yolundan qalmadı! Və…beləcə bitdi bir əsgər ömrünün balladası.
Təbii ki, hələ çox qəhrəmanlarımız olacaq. Çünki odlar yurdu Azərbaycan həmişə qəhrəmanlar diyarı olub. Nəhayət, son olaraq müəllif yazılarının birində qeyd olunur: “Qoy onlar  son qəhrəmanlarımız deyil, sonuncu şəhidlərimiz olsunlar!”

SAMİR QURBANOV