Rusiya-Ukrayna müharibəsi getdikcə Rusiyaya qarşı ittifaqlar güclənir. Almaniya kansleri Merz prezident Trampın ABŞ-ın Ukraynanı Avropalı müttəfiqlər tərəfindən ödəniləcək yeni silahlarla təmin edəcəyi barədə bəyanatını dəstəkləyib.
Elchi.az xəbər verir ki, ABŞ prezidenti Donald Tramp Ukraynaya irimiqyaslı silah dəstəyi ilə bağlı yeni təşəbbüslə çıxış edib.Trampın təklifinə görə, silahları ABŞ istehsal edəcək, lakin xərcləri Avropa ölkələri öz üzərinə götürəcək.
Almaniyanın Xristian Demokrat İttifaqının lideri Fridrix Merz bazar ertəsi axşam yazılı açıqlamada, “Prezident Tramp bu gün mühüm təşəbbüs irəli sürüb: Avropalı tərəfdaşlar bu təşəbbüsü maliyyələşdirsələr, ABŞ Ukraynaya geniş miqyasda silah tədarük edəcək” – deyib.
Merz, Trampla bu yeni yanaşmanı son günlər bir neçə dəfə müzakirə etdiklərini və Almaniyanın bu təşəbbüsdə “həlledici rol” alacağını vurğulayıb.
“Biz avropalılar bunu öz təhlükəsizliyimiz üçün edirik. Bu, Ukraynanın Rusiyanın bomba terrorundan müdafiəsinə kömək edəcək. Yalnız bu yolla Moskvaya təzyiq artacaq və o, nəhayət, sülh danışıqlarına məcbur edilə bilər”, – o deyib.
“Nəhayət, biz təhlükəsizlik üzrə tərəfdaşlar kimi birlikdə işlədiyimizi nümayiş etdiririk. İndi təfərrüatları tez bir zamanda yekunlaşdıracağıq. Bu məsələ ilə bağlı tərəfdaşlarımızla əlaqə saxlayırıq”, – o əlavə edib.
Tramp bazar ertəsi Oval kabinetdə NATO-nun baş katibi Mark Rutte ilə görüşündə Ukrayna sülh səylərində irəliləyişin olmamasından Rusiyadan məyus olduğunu bildirib. O , sülh razılaşması əldə olunmasa, Rusiyaya 100% ikinci dərəcəli tariflər tətbiq edəcəyi ilə hədələyib.
Tramp həmçinin NATO vasitəsilə Ukraynaya silah tədarük ediləcəyini və bu silahların ABŞ-da istehsal ediləcəyini, lakin bütün xərclərin avropalı müttəfiqlər tərəfindən qarşılanacağını açıqlayıb.
“Biz bu gün razılaşdıq… Ukraynaya göndərdiyimiz silahların pulunu onlar ödəyəcəklər. ABŞ bu işin əvəzini ödəməyəcək. Biz onları sadəcə istehsal edəcəyik, onlar isə pulunu ödəyəcəklər ” deyib.
NATO-nun baş katibi Mark Rutte razılaşmanı təsdiqləyərək, “ABŞ Ukraynaya lazımi silahları NATO vasitəsilə geniş miqyasda çatdırmaq qərarına gəlib. Bütün xərcləri avropalılar ödəyəcək” deyib.
Nuranə Məmmədova
