Rusiyanın xarici işlər naziri Sergey Lavrov bildirib ki, ABŞ və İran arasındakı gərginlik yalnız bütün tərəflərin maraqlarını əks etdirən razılaşma ilə başa çata bilər.
Rusiya Xarici İşlər Nazirliyinin açıqlamasına görə, xarici işlər naziri Sergey Lavrov Afrika turu çərçivəsində Mozambikin paytaxtı Maputoya səfər edib. Mozambik prezidenti Daniel Çapo tərəfindən qəbul edilən Lavrov, mozambikli həmkarı Manuela dos Santos Lukas ilə görüşüb. İki nazir görüşdən sonra birgə mətbuat konfransı keçiriblər. Çıxışında Lavrov Mozambiklə strateji tərəfdaşlığı inkişaf etdirmək və gücləndirmək niyyətində olduqlarını bildirib. Mozambik hökumətinin ölkənin şimalındakı terror təhlükəsini aradan qaldırmaq təşəbbüslərini dəstəklədiklərini deyən Lavrov deyib: “Biz Mozambikə müxtəlif formalarda, o cümlədən kadr hazırlığı və lazımi silah və hərbi texnikanın təchizatı ilə dəstək veririk”.
Mətbuat konfransında çıxış edən Lavrov Ukrayna ilə bağlı da şərh verərək dedi: “Qərb danışıqlara hazır olduğunu iddia edərək Rusiyaya açıq şəkildə ultimatum verir. Qərb böhranın danışıqlar yolu ilə həllinə çağıraraq ikiüzlülüyünü nümayiş etdirir. Bu həll yolları 2014, 2015 və 2019-cu illərdə Qərbin zəmanətləri ilə əldə edilib. Lakin hər dəfə bu zəmanətlər Qərb tərəfindən pozulub. Qərb həmçinin Rusiya ilə Ukrayna arasında 2022-ci ildə əldə edilən razılaşmanı pozub. Biz inanmırıq ki, Qərb həqiqətən danışıqlar yolu ilə həll yolu istəyir. Bu baxımdan xoşməramlılığımız və ümidimiz tükənib”.
İranla bağlı Lavrov bildirib ki, “Bu məsələ yalnız bütün tərəflərin maraqlarını əks etdirən razılaşma ilə həll edilə bilər. Bu razılaşma təkcə İranı, qonşu ölkələri və ABŞ-ı deyil, həm də mövcud vəziyyətin qlobal iqtisadiyyata mənfi təsirindən əziyyət çəkən bütün ölkələri əhatə etməlidir”.
Şayəstə
