Rusiya Müdafiə Nazirliyi Ukrayna ilə əsir mübadiləsi çərçivəsində 195 rus əsgərinə qarşı 195 ukraynalı əsgərin qarşılıqlı olaraq azad edildiyini bildirib.
Elchi.az xəbər verir ki, Nazirlikdən verilən açıqlamada Rusiya ilə Ukrayna arasında əsir mübadiləsinin olduğu bildirilib.
Bəyanatda aşağıdakı ifadələr yer alıb:
“Danışıqlar prosesi nəticəsində 195 rus əsgəri Kiyev administrasiyasının nəzarətində olan torpaqlardan geri alınıb. Bunun müqabilində Ukrayna Silahlı Qüvvələrinin 195 əsgəri təhvil verilib. Rusiya əsgərləri təyyarələrlə Moskvaya aparılacaq. Nazirliyin tabeliyində olan səhiyyə ocaqlarında müalicə alırlar, ehtiyata buraxılan əsgərlərə tibbi və psixoloji dəstək göstərilir”.
Ukrayna prezidenti Vladimir Zelenski də sosial şəbəkədə əsir mübadiləsi ilə bağlı açıqlama verərək, “207 əsgərimiz və mülki vətəndaşımız evlərinə qayıtdı. Əsir düşənlərin hamısını geri qaytaracağıq. Bununla bağlı işlər davam edir” deyib.
Rusiya Müdafiə Nazirliyi yanvarın 24-də Ukrayna tərəfindən atılan raketlə Belqorod vilayətində aralarında ukraynalı məhbusların da olduğu Rusiya təyyarəsinin vurulduğunu açıqlayıb.
Açıqlamada təyyarədə 6 nəfərlik ekipajın olduğu, toqquşmalar zamanı əsir düşən 65 Ukrayna əsgərinin və onları müşayiət edən 3 rusiyalı hərbçinin olduğu, təyyarənin bütün ekipaj və sərnişinlərinin həyatını itirdiyi bildirilib.
Kremlin sözçüsü Dmitri Peskov hadisədən sonra verdiyi açıqlamada Rusiya ilə Ukrayna arasında məhbus mübadiləsi prosesinin davam edib-etməyəcəyinin aydın olmadığını bildirib.
Şayəstə Hüseynova