“Zamanın uzanması Rusiyanın qalib olmasına səbəb ola bilər”
Bu gün Rusiyanın xarici işlər naziri Sergey Lavrovun Türkiyəyə səfəri baş tutub. Lavrov türkiyəli həmkarı Mövlud Çavuşoğlu ilə görüşüb. Ankaradakı görüş zamanı tərəflər Ukrayna, Suriya, Əfqanıstan böhranını, eləcə də Ukrayna taxılının ixracı məsələsini müzakirə ediblər.
Qeyd edək ki, dünən Türkiyənin milli müdafiə naziri Hulusi Akar da rusiyalı həmkarı Sergey Şoyqu ilə danışıqlar aparıb. Nazirlər Ukrayna ərazisindən taxıl ixracı probleminin həlli ilə əlaqədar Qara dənizdə təhlükəsizlik məsələlərini müzakirə ediblər. Söhbət zamanı əsas diqqət Ukrayna və Suriyadakı vəziyyətə yönəlib.
Sosial Tədqiqatlar Mərkəzinin Mətbuat xidmətinin rəhbəri, beynəlxalq məsələlər üzrə mütəxəssis Əziz Əlibəyli Elchi.az-a açıqlamasında bildirib ki, məlum müzakirələr effektiv nəticələr verəcək.
Onun sözlərinə görə, Rusiya-Ukrayna müharibəsi sona doğru çatmaqdadır:
“Çünki Rusiya Ukraynanın cənubu və cənub-şərq istiqamətlərində qövsvari olaraq üzu Xarkovdan, Luqansk, Donetsk, Xerson və Krım daxil olmaqla Odessaya qədər bölgəni götürməkdədir. Son olaraq Odessanın ələ keçirilməsi ilə çox güman ki, proses yekunlaşacaq. Rusiya Odessanı ələ keçirməklə Ukraynanı Qara dəniz ölkəsi olmaqdan kənarlaşdırır. Digər məsələ hansısa danışıqlar masasında əyləşərkən Krımla bağlı mövzunun gündəmə gəlməməsidir. Krımdan şimalda yerləşən Xerson kimi böyük bir ərazi işğal olunub. Digər əsas məsələ Donbasla bağlıdır, bunun həlli də öz əksini tapmış oldu. Çünki Donbasda rus əhalisi də yaşayırdı, Rusiya onların da təhlükəsizliyi təmin etdi. Ukraynanın Qərb ittifaqı, NATO və Avropa İttifaqına (Aİ) daxil olması ilə bağlı ciddi bir əndişələr var idi. Bu əndişələr müharibə nəticəsində aradan qalxmış oldu. Qərb indiki zamanda parçalanmış Ukraynanı hansısa formada özünə qəbul edəcəkmi, bu, bir az sual altında olan məsələdir. Rusiya artıq birbaşa əlinə keçirdiyi bölgələrlə Moldova, oradan da üzü Ruminya və Bolqarıstanla birbaşa NATO sərhəddində dayanmış olacaq”.
Ə.Əlibəylinin qənaətincə, Rusiya üçün məsələ müharibə səviyyəsində bitmiş kimi görünür:
“Qərb müəyyən mənada nələrəsə nail olmaq üçün müharibənin uzadılmasında maraqlıdır. Amma Rusiyanın əlində taxıl böhranı və enerji məsələsi kimi ciddi bir təzyiqi alət olduğundan burada zamanın uzanması Rusiyanın qalib gəlməsinə gətirib çıxara bilər. Sergey Şoyqu ilə Hulisi Akarın, həmçinin Sergey Lavrovla Mövlud Çavuşoğlunun danışqları müəyyən irəliləyişə səbəb olacaq. Çünki Rusiya öz istəklərinə çatdıqdan sonra mütləq mesajlar verməyə başlayıb”.
Yeganə
Son şərhlər