Rusiyanın Müdafiə Nazirliyi 2017-ci ildə hərbi yükləri daşımaq üçün 5 min 265 vaqon fraxtə edib. Bunun 4 min 126 vaqonu yükləri qərb sərhədləri istiqamətində, Belarus ərazisinə daşıyacaq.
Virtualaz.org “Alman dalğası”ına istinadən xəbər verir ki, bu, Rusiyanın 2016-cı ildə Belarus ərazisinə daşıdığı hərbi yükdən 83 dəfə çoxdur.
Bəs Rusiyanın birdən-birə Belarusa hərbi yüklərin daşınmasını bu cür kəskin artırmasının səbəbi nədir? Hərbi ekspertlər hesab edir ki, bu, gələn il Belarus ərazisində Rusiya ilə birgə keçiriləcək “Qərb-2017” irimiqyaslı hərbi təlimləri ilə bağlıdır. Rəsmi Minsk isə informasiyanı şərh etmir.
Hərbi ekspert Pavel Feleqenhauer bildirib ki, Rusiya-Belarus birgə qoşun qruplaşmasının təlimləri gələn il NATO sərhədləri yaxınlığında keçiriləcək və öz miqyasına görə misli görünməmiş təlimlər olacaq. Təlimlərdə Avropa kontinentində böyük müharibə aparılması imkanları araşdırılacaq.
Ekspertin sözlərinə görə, birgə təlimlərə Rusiya ordusunun tank hissələri də cəlb olunacaq. Tankların dəmiryol platformaları ilə Belarusa daşınması planlaşdırılır. Gözlənilir ki, təlimlərə yüz minlərlə hərbçi qatılacaq. Felqenhauer hesab edir ki, 4 min 126 vaqon yük Belarusa daşınacaq hərbi yüklərin heç də hamısı deyil. Yüklərin bir hissəsi məxfi daşınacaq və reallıqda Belarus ərazisinə daşınacaq hərbi yüklərin həcmi daha çox olacaq.
Lakin analitiklərə görə Rusiyanın məqsədi NATO-ya güc nümayişi ilə yanaşı eyni zamanda Belarusun da onun təsir dairəsində olduğunu nümayiş etdirmək məqsədi daşıyacaq. Hansı ki, indi Belarus bunda o qədər də maraqlı deyil. Minsk Qərblə münasibətləri normallaşdırmağa çalışır və bu istiqamətdə xeyli irəliləyişlərə nail olub. Ona görə də Rusiyanın Belarus ərazisində güc nümayiş etdirməsi Minskə sərf etmir. Görünür bu səbəbdəndir ki, Rusiya hərbi yüklərin daşınması üçün minlərlə vaqon sifariş verdiyi halda Belarusda hələ təlimlərə hazırlaşmırlar.
Son şərhlər