Bu günlərdə hüquq müdafiəçisi Rəsul Cəfərovun Bakı Ağır Cinayətlər Məhkəməsində növbəti məhkəmə prosesi keçirilib. Prosesdə dindirilən şahidlər arasında Bakı Caz Mərkəzinin rəhbəri Rüfət Ələsgərov da var idi. Cazmen ifadəsində Rəsul Cəfərovu şəxsən tanımadığnı bildirib. Onun sözlərinə görə, Rəsul Cəfərov və həmkarları tərəfindən hazırlanan layihə çərçivəsində «Jazz center»də tədbir keçirilib. Rüfət Ələsgərov bu tədbirə görə onlara 2500 manat vəsait ödənildiyini və tərəflər arasında heç bir problemin olmadığını, ödəmənin də düzgün və problemsiz həyata keçirildiyini qeyd edib.
Baş verən bu olaylar barəsində Bakı Caz Mərkəzinin rəhbəri Rüfət Ələsgərov musavat.com-a açıqlama verib: “Mən Rəsul Cəfərovu şəxsən tanımıram və onu heç vaxt görməmişəm. Ümumiyyətlə, onun keçirdiyi tədbir barəsində mənim xəbərim olmayıb. Bizim mərkəzdə caz musiqisi konsertlərindən başqa banketlər və kiçik tədbirlər də keçirilir. Rəsul Cəfərov da o tədbirlərdən birini keçirib, vəssalam…
Təkcə konsertlərdən gələn gəlirlə mərkəzin fəaliyyətini davam etdirə bilmərik. Bu səbəbdən də vaxtaşırı özəl tərbilərə də icazə veririk. Mərkəzdə kiçik restoran, kafe fəaliyyət göstərir və kim istəyirsə, bu xidmətimizdən də istifadə edə bilir. Demək olmaz ki, gündə 50-60 nəfət cazla maraqlanıb, mərkəzə gəlir. Yəni adi günlərdə çox az adam bura təşrif buyurur”.
Rüfət Ələsgərov Bakı Caz Mərkəzinin fəaliyyəti barəsində də danışıb: “Mərkəzimiz 2002-ci ildən fəaliyyət göstərir. Bazarertəsindən başqa həftənin bütün günləri qapımız musiqçilərin üzünə açıqdır. Burada həm yerli, həm də xaricdən gələn musiqiçilərin konsertləri təşkil edilir. Dünya şöhrətli caz musiqiçiləri bizim mərkəzə tez-tez müraciət edirlər. Ölkəmizdə caz musiqsinə maraq xeyli artıb.
Qeyd edim ki, hazırda dünyada öz ifaları ilə şöhrət qazanmış caz ifaçılarımızın çoxunun fəaliyyəti bu mərkəzdən başlayıb. Bunlardan Şahin Növrəsli, İsfar Sarabski, Emil Əfrasiyaboğlunun və digərlərinin adlarını çəkə bilərəm. Məndən əvvəl mərkəzin rəhbəri işləmiş cazmen Emil İbrahim Emil Əfrasiyaboğluna vaxtında xeyli dəstək olmuş, ona kömək etmişdi. Hazırda Emil təhsilini xaricdə davam edir”.
Cazmen ölkəmizdə keçirilən möhtəşəm caz konsertlərindən söz açıb: “Bildiyiniz kimi, ölkəmizdə artıq caz festivalları keçirilir. Bunun nəticəsində məşhur cazmenlər bizim mərkəzə toplaşır, öz möhtəşəm caz proqramları ilə caz sevənlərin qarşısında çıxış edirlər.
Bəzən konsertlər gözlənilmədən baş tutur. Məsələn, bizə müraciətlər olunur, yaxud hansısa konserti planlaşdırırq və həyata keçirirk. Gürcüstandan, Rusiyadan bizə tez-tez müraciətlər olunur. Yerli caz ifaçılarımz da onlara qoşulur. Bu, çox yaxşı haldır. Ona görə ki, hər caz ifaçısının özünəməxsus üslubu var və gənc cazmenlər hər ifaçıdan nəsə öyrənməyə çalışırlar.
Əvvəllər belə bir mərkəz olmadığından cazmenlərimiz fərdi olaraq, məşğul olurdularsa, bu mərkəzin sayəsində cazmenlər öz fəaliyyətlərini ortaya qoyub, müqayisə edə bilirlər. Bu amil caz musiqimizin inkişafında mühüm rol oynayır. Bakı Caz Mərkəzi çox gənclərə yol açıb. Bura demək olar ki, daha çox gənclər gəlir.
Təbii ki, əgər imkanımız olsaydı, burada siniflər açıb, təhsil də verərdik. Lakin hazırkı durum buna imkan vermir. Dövlət tərəfindən də heç bir dəstək almırıq. Hər şey mərkəzin öz maddi büdcəsi sayəsində həyata keçirilir”.
Xatırlaqdaq ki, bu günlərdə məhkəməsi keçirilən Rəsul Cəfərov ötən il avqustun 2-də həbs olunub. Ona qarşı vergidən yayınma, qanunsuz sahibkarlıq, mənimsəmə kimi ittihamlar irəli sürülüb.
Lakin yerli və beynəlxalq ictimaiyyət hesab edir ki, Rəsul Cəfərova qarşı ittihamlar onun hüquq müdafiəçisi kimi göstərdiyi fəaliyyət ilə bağlıdır. Təsadüfi deyil ki, “Amnesty International” beynəlxalq hüquq-müdafiə təşkilatı Rəsul Cəfərovu “vicdan məhbusu” elan edib.
Xalidə Gəray
