“Hazırda Qərbin əsas marağı Ukraynadadır və ikinci cəbhənin açılması bu dairələrə necə deyərlər, sərf etməyəcək. Daha doğrusu, biz bu məsələdə 2008-ci il Gürcüstan olaylarını xatırlaya bilərik”-bu sözləri Elchi.az-a açıqlamasında siyasi şərhçi Rövşən Rəsulov deyib.
O həmçinin qeyd edib:”Hazırda işğalda qalan Abxaziyanın və Cənubi Osetiyanın Rusiyanın protektoratı altında olması da belə qənaətə gəlməyə çoxsaylı zəminlər yaradır. Biz burada Cənubi Qafqazın digər əsas oyunçuları – Türkiyə və Azərbaycanı, həmçinin İran faktorunu da unutmamalıyıq. Türkiyə artıq regiondadır və Azərbaycanla hərbi də daxil olmaqla çoxşaxəli müttəfiqlik əslində hər şeyi özü-özlüyündə deməkdədir. Qaldı ki, İran amilinə, rəsmi Tehran daxilində yaranmış böhranlı vəziyyətinə baxmayaraq, Qərbin Ermənistana meyllənməsi faktını əsla həzm etməyəcək. Bu məqamda İranın Rusiya, bir sıra hallarda Türkiyə ilə də mövqeləri bölüşülür. İran Ermənistana ona görə havadarlıq edir ki, Ermənistan uzun illər Rusiyanın forpostu rolunu oynayıb və İranla Rusiyanın maraqları həmin cəhətdən üst-üstə düşüb”.
Siyasətçi eyni zamanda Ermənistanın açıq-açığına Qərblə təmaslara keçməsi və siyasətini də qərbyönümlü fonda qurması sonda Tehranın da qıcıqlanmasına səbəblər yarada biləcəyini dilə gətirib:
” Düzdür, hazırda biz bunu müşahidə etmirik, amma regional siyasət elə bir faktordur ki, onun anidən hansı səmtə doğru dəyişəcəyi an məsələsidir. Bu baxımdan, Ermənistan nə zamansa, gözləmədiyi anda İranın da sərt qınaqları ilə üz-üzə qala bilər. Tehran İrəvanın qarşısında sərt hesab soruşa bilər ki, ona uzun illər nəfəs borusu olduğu halda Ermənistanın Qərbi İran sərhədlərinə doğru cəlb etməsi hansı məqsədlərə söykənir?
Tehran hələlik gözləmə mövqeyində olduğunu vurğulayan Rövşən Rəsulov həmçinin bildirir:”Azərbaycanın isə xüsusilə Rusiya-Ukrayna müharibəsindən sonra daha sürətlə Avropanın əsas enerji ixracatçısına çevrilməsi amili və son dövrlərdə bu amilin növbəti geniş perspektivlərə doğru irəliləməsi rəsmi Bakının da mövqeyini möhkəmləndirir”.
Havar Şəfiyeva
Son şərhlər