“Azərbaycanda hakimiyyət sədaqət prinsipi ilə idarə olunur. Kim əhəmiyyətli post tutursa, dərhal öz yaxın qohumunu ətrafına toplayır”.
Bu sözləri AİM.Az-a politoloq Natiq MİRİ qohumlaşan məmurların dövlət büdcəsinini talamasından danışarkən deyib. Onun sözlərinə görə, yüksək vəzifəlilərin bu cür davranışı qorxu sindromu ilə əlaqədardır:
“Onlar başqalarına etibar etmədikləri üçün ətraflarına daha çox özününküləri yığırlar. Düşünürlər ki, ətrafındakılar özününkülər olarsa, büdcədən artan pulları mənimsəmək və onu sirr şəkilində saxlamaq daha asan olur. Ancaq görünür ki, bəzən bu qohumluq əlaqələri əndazəni aşır. Vəziyyət o həddə çatır ki, onlar dövlətə ziyan vura bilirlər. Bu onun göstəricisidir ki, idarəetmədə köklü islahatlara ehtiyac var. Siyasi, iqtisadi, xüsusilə, hüquqi yöndə islahatlar aparılmalıdır. Çünki ölkəmizdə ədalət sistemi bərbad haldadır. Azərbaycanda hüquq gözlənilmir. Dövlətimizin inkişafı üçün ədalət sistemi yaradılmalıdır. Əks halda qohum məmurların başıpozuqluğu davam edəcək”.