İsrailin 2023-cü il oktyabrın 7-dən etibarən Qəzza zolağına təşkil etdiyi hücumlarda ölənlərin sayı son 24 saatda 70 nəfər artaraq 61 min 897 nəfərə çatıb.
Elchi.az xəbər verir ki, Qəzzadakı Fələstin Səhiyyə Nazirliyi yazılı açıqlamada İsrailin davam edən hücumları nəticəsində ölən və yaralananlarla bağlı son məlumatları paylaşıb.
Bu gün Qəzza zolağında 70 ölü və 385 yaralının xəstəxanalara çatdırıldığı bildirilib.
Belə ki, 2023-cü il oktyabrın 7-dən etibarən İsrailin Qəzza zolağına təşkil etdiyi hücumlarda həyatını itirənlərin sayının 61 min 897 nəfərə, yaralı sayının isə 155 min 660 nəfərə yüksəldiyi bildirilib.
Yanvarın 19-da Qəzzada razılaşdırılmış atəşkəsi pozan İsrail ordusunun martın 18-dən bu yana həyata keçirdiyi hücumlarda 10 min 362 fələstinlinin həyatını itirdiyi, 43 min 619 nəfərin isə yaralandığı bildirilib.
Qəzza zolağında dağıntılar altında hələ də minlərlə ölü olduğu bildirilir.
Yardım paylama məntəqələrinə hücumlar
İsrailin ABŞ-ın rəhbərlik etdiyi “Qəzzəyə Humanitar Yardım Fondu”nun Qəzzada qurduğu sözdə yardım paylama məntəqələrində fələstinliləri hədəf alan sistematik hücumlarda son 24 saatda 26 fələstinlinin öldüyü, 175 nəfərin yaralandığı bildirilib.
Belə ki, mayın 27-dən bu yana ölənlərin sayının 1924 nəfərə, yaralananların sayının isə 14288 nəfərə yüksəldiyi qeydə alınıb.
Aclıq və qida çatışmazlığı nəticəsində ölənlər
İsrailin sərhəd qapılarını bağlayaraq və yardım girişini məhdudlaşdıraraq ölkəni aclığa sürüklədiyi Qəzzada son 24 saatda biri uşaq olmaqla 11 nəfərin həyatını itirdiyi bildirilib.
Aclıq və qida çatışmazlığı səbəbindən həyatını itirənlərin sayının 108-i uşaq olmaqla 251 nəfərə yüksəldiyi qeyd edilib.
Nuranə Məmmədova
