Ağır hepatit xəstəsi olan 15 yaşlı Fidan Əliyevanın əməliyyat edilməsi üçün yardım kampaniyasının başlaması haqda xəbər vermişdik. Həkimlərin yaşayacağına 3 ay vaxt qoyduğu Fidanla bağlı ötən ilin noyabrında virtualaz.org saytında geniş reportaj yer almışdı.
Bir müddət sonra Fidanın atası, Qarabağ əlili Fərhad Əliyev qızının əməliyyat olunması üçün yardım etmək istəyən insanların olduğunu demişdi.
Fərhad Əliyev Fidanın müalicəsi üçün Türkiyəyə aparıldığını, müayinə edildiyini və analizlər verdikdən sonra əməliyyat ediləcəyini söyləmişdi.
Artıq Fidan əməliyyat olunub. Bu haqda Türkiyə mətbuatı da məlumat yayıb. “Milliyet” qəzetində yer alan xəbərə görə, 5 ildir ağır xəstəlikdən əziyyət çəkən Fidana anası Yeganə Əliyevanın qaraciyərinin bir hissəsi köçürülüb. Uğurlu keçən əməliyyatdan sonra Fidan ona dəstək olan hər kəsə təşəkkür edib: “Kampaniyaya dəstək verənlər və türkyəli həkimlər sayəsində yeni bir həyata başladım. Onlar olmasaydı bəlkə də 2015-ci ili görə bilməyəcəkdim”.
Qeyd edək ki, Fidanın əməliyyatı Memorial xəstəxanasında professor Yalçın Polat tərəfindən həyata keçirilib.
