Avstriyanın Vyana şəhərində keçiriləcək 2026-cı il Avroviziya Mahnı Müsabiqəsində Portuqaliyanı təmsil etmək üçün yarışan müğənnilər, seçildikləri təqdirdə iştirakdan imtina edəcəklərini bildirən birgə bəyanat yayıblar.
Elchi.az xəbər verir ki, bu, Avropa Yayım Birliyinin (EBU) ötən həftə İsrailin 2026-cı il Avroviziya Mahnı Müsabiqəsində iştirakı ilə bağlı səsvermədən yayındığı və daha sonra İspaniya, Hollandiya, İrlandiya, Sloveniya və nəhayət İslandiyanın İsrailə qarşı etiraz olaraq müsabiqədə iştirak etməmək qərarına gəlməsindən sonra baş verib.
Gələn il Portuqaliyanı Avroviziyada təmsil etmək üçün milli yarışmada yarışacaq 16 müğənni sosial media vasitəsilə birgə bəyanat yayaraq bildiriblər ki, “həm ölkələrinin, həm də dünyanın İsrailə qarşı səssizliyi faciəyə ortaq olmaq deməkdir”. Bateu Matou, Cristina Branco, Djodje, Evaya, Ines Sousa, Marquise Music Group, Francisco Fontes, Gonçalo Gomes, Jacareu, Nunca Mates, Mandarim və Rita Dias da daxil olmaqla bir qrup portuqaliyalı müğənni və qrup Avroviziyada iştirakdan imtina etdiklərini açıqlayıblar. Bəyanatda deyilirdi: “Rusiyanın 2022-ci il Avroviziya Mahnı Müsabiqəsində iştirakı siyasi səbəblərə görə (Ukraynanın işğalı) qadağan edilsə də, eyni tədbirin BMT-nin məlumatına görə, Qəzzada fələstinlilərə qarşı soyqırım aktları törədən İsrailə tətbiq edilməməsinə təəccüblənirik.” Sənətçilər həmçinin Portuqaliya dövlət televiziya kanalı RTP-ni İsrailin Avroviziyada iştirakı və müsabiqədən çıxmaq qərarı verməməsi ilə bağlı EBU Baş Assambleyasında susqunluğuna görə tənqid ediblər.
Şayəstə
