Müxalif siyasi baxışlarına görə adamın həbslə cəzalandırılması yalnış qərardır. Bu Azərbaycanın siyasi rəhbərliyi və Azərbaycan dövləti üçün ciddi zərbələr gətirəcək. Bu sırada Milli Şura rəhbərlərindən Tofiq Yaqublunun həbsini xüsusi qeyd etmək gərəkdir. Tofiq bəyin həbsdə saxlanması, səhhətindən dolayı bu günki vəziyyəti üzərindən ciddi siyasi oyunlara start verilib. İlk ondan başlayaq ki, bu kimi həbslər Azərbaycana hansı prespektivi vəd edir?
-Beynəlxalq basqılar artır;
-Azərbaycan söz və insan azadlıqlarının məhdud olduğu ölkələr sırasına çıxarılır;
-Küçə ixtişaşları davam etdirilir;
-Cəmiyyətin neytral təbəqəsinin müxalif yönümlü olmasına imkan yaranır;
-Mühacir, söyüş mediası və müxalifəti yenidən aktivləşir;
***
Bu proses həm də ölkə ictimai rəyinin fikrini yayındırmağa xidmət edir. Azərbaycanı,
-FETÖ ilə əlaqəli məmurlar;
-Dövlət büdcəsi talançıları;
-İslahat dalğasının dərinləşməsi işinlərindən yayındırır.
-Dövlət və müstəqil elektron KİV-lər bəlli mövzularından əsasən qaçır. Sıravi və neytral insanlar, qarşı tərəfin, yəni radikal müxaliflərin haqlı olduğuna, habelə ölkədə islahatların ancaq sözdə aparıldığına, mahiyyətdə heç nəyin dəyişmədiyinə inanmağa başlayır. Beləliklə, dövlət bütün cinahlarda daha nüfuzlu və söz sahibi olanı, orta təbəqəni itirir, radikalların əli güclənir.
-Sürətlə yaradılan internet TV-lər, bu tv-lərin tanınan, amma bəlli dairələr tərəfindən niyəsə qəbul olunmayan, reytinqli simaları da narazılara qatılır.
İndilik bu KİV simaları özlərinə iş yeri yaratmaq və maliyyə mənbəyi axtarmaq üçün təkbaşına yola çıxıb. Bir informasiya daşıyıcısının, şərhçisinin, üstəgəl iyirmi yeddi illik müstəqillik dönəmi tarixini yaşamış media adamlarının bu qərarından qorxulu nəsə ola bilməz.Və bunu peşəkarlar təbii ki, hər kəsdən daha yaxşı anlamalıdır.
Təbii ki, bu təbəqə beynəlxalq donorların da diqqətini cəlb etməyə bilməz. Niyə? Onlar çox gözəl anlayır ki, söyüş mediasının Azərbaycandakı dayaqları artıq laxladılıb və bu standart yavaş-yavaş sıradan çıxır. Çünki onlar söyməkdən başqa iş görəcək ağıla sahib deyillər. Söyüş isə standartdır, onda yenilik yoxdur. Yenilik yerli KİV-in qəbul olunmayan və konkret güc sayılan təbəqəsidir.
***
Yenidən T.Yaqublunun məsələsinə qayıdaq. Bu gün Tofiq bəy şüurlu surətdə özünə qəsdə həvəsləndirilir. Bu prosesi dayandırması üçün ona kimsə təsir etmir. Əksinə aşırı iradəliliyi, gücü, fövqəladə siyasi bacarığı təriflənir. Əslində Tofiq bəy, Əbülfəz bəyin ölümündən sonra qəbul edə bilmədiyim müxalif cinahda əqidəsi ilə tanınan az sayda adamlardandır. Sadə, səmimi, iradəli və qazi olan T.Yaqublunun həyatını itirməsi, həbsdə daha uzun müddət qalması, həm müxalif, həm hakim düşərgədəki siyasi oyunbazlara təbii ki, sərfəlidir. Onlar yaxşı bilir ki, Tofiq bəy standartlı birinin həyatını itirməsi əslində nəyə gətirəcək.
Bu gün üçün təhlükəli məqam həm də odur ki, T.Yaqublunun məsələsi artıq Polşa mediasında işıqlandırılır. Sual oluna bilər, Polşa hara, Azərbaycan hara? Polşaya Azərbaycanda baş verən siyasi prosesdən nə?!.
Burada bir haşiyə çıxıb qeyd etməkdə fayda var. Polşa o ölkədir ki, Belarus hadisələrinin informasiya tribunası NEXTA-Teleqramm kanalı orada yaşayan gənc müxalifətçi Stepan Putilo tərəfindən idarə olunur. Yeri gəlmişkən kütləvi ixtişaşlar yaratmaqda günahlandırılan gəncə Belarus qanunvericiliyi ilə cinayət işi qaldırılıb, onu on brş illik azadlıqdan məhrumetmə cəzası gözləyir. Bundan başqa, Belarus prezidentliyinə eks namizəd Valeriy Çepkalo ilə Qərbin siyasi görüşləri də məhz Polşada baş tutub.
Bunu da xatırlatmaqda fayda var. Bu gün T.Yaqublu şəhərdəki özəl xəstəxanalardan birində, şəxsi həkiminin nəzarəti altında aclıq aksiyasını davam etdirir. Onun yaxınları və siyasi əqidədaşları Tofiq bəyin artıq həyati təhlükəsinin mövcudluğunda iddia edir. Xatırladaq ki, Belarus olayları da aksiya zamanı bir nəfərin silahlı insidet nəticəsində qətl edilməsindən sonra qızışmışdı. Azərbaycanlı siyasətçinin, siyasi baxışlarına görə həbsdə saxlanması, aclıq etməsi, səhhətinin günbəgün ağırlaşması və ehtimal olunan ölümü sizcə nələrə yol aşar məmləkətdə?
Hələ T.Yaqublunun səhhətindən dolayı ölkənin neytral təbəqəsinin ölkə başçısına müraciətlər ünvanlaması sonucunda onun azad edilməsini istisna etməyənlər ikinci variantı da düşünüblər. Diqqət etsəniz, uzun müddətdir AXCP-nin aparıcı simalarından olan Fuad Qəhrəmanlının məsələsi arxa plandadır. Əslində ailəsində baş verənlərdən dolayı prosesə start onun üzərindən verilmişdi, ancaq işin gedişində anlaşıldı ki, əqidə və iradəsinə görə F.Qəhrəmanlı, T.Yaqublu deyil. Amma yenə də nəsə etmək, ən azından ara qarışdırmaq mümkün ola bilər deyə düşünürlər.
Yeri gəlmişkən, özləri demiş, “radikalların AZTV-si”, “Oamanqızı TV”, artıq bu məsələni gündəmə gətirir: Beynəlxalq presinqlər artır, mitinqlər dalğası gəlir, siyasi məhbuslar buxarılmır, Azərbaycanın siyasi hakimiyyəti neynəyəcək?
Hər kəs yaxşı bilir, bu nə Sevincin zəkasının məhsulu, nə onun intellekt və mübazirə səviyyəsi deyil. Bu böyük güclərin ciddi hücumuna hazırlıqdan dolayı xəbər tirajlanmasıdır.
Sonda bir məsələyə də diqqət etməkdə fayda ola bilər. T.Yaqublu məsələsi Polşada dərc olunan Mərkəzi və Şərqi Avropa Ölkələrindən xəbərlər üzrə ixtisaslaşmış “New Eastern Europe” dərgisi üzərindən tirajlanır. Dərgi Qərb maraqlarından çıxış edən media quruluşudur və daha çox siyasi mövqeyindən dolayı təqib olunanların həyatını nəzarətdə saxlayır. Bildiyiniz kimi siyasi məhbus məsələsi, Qərbin maraq dairəsində olan dövlətlərə basqı üçün çox ciddi vasitələrindən sayılır.
***
…Dünya regionlar üzrə ixtisaslaşmış media quruluşları qurub. Ən müxtəlif ölkədə fəaliyyət göstərir. Zamanında diaspora təşkilatları, səfirliklər, hətta iş adamlarının dəstəyi ilə Azərbaycan mediası da belə üstünlüklərə sahib idi dünyanın müxtəlif ölkələrində. Elə bu üzrdən də Qafqazlarda ən güclü media quruluşlarına sahib idi və hətta Türkiyə, Rusiya KİV-ləri ilə rəqabətə gücü yetirdi. İndi bu güc də, bu fəaliyyət də sıfırın altındadır. Biz nə zaman ayılacağıq, üzərimizə çox pis gəlindiyinin, informasiya və soyuq müharibənin bircə addımlığında olduğumuzun haçan fərqində olacağıq, orası bəlli deyil? Və hər gün bir az çənbərimizi daraldırlar…
Jalə Mütəllimova
Son şərhlər